( 13 Maggio 1484 ).
Galeaz Episcopus Agenensis Reverendissimj in Christo Patris et dominj dominj Julianj Episcopi Ostiensis Sancti Petrj ad vincula Sancte Romane Ecclesie Cardinalis dignissimi ac Summi poenitentiarij in Civitate Bonon. Exarchatuque Ravenatensi et provintia Romandiole, alijsque terris et locis Apostolico sedis legati in spiritualibus et temporalibus Vicarij generalis Locumtenens cum omnimoda potestate. Dilectis nobis in Christo Jacobomarie, et Ludovico fratribus et filijs quon dam egregij Doctoris dominj Antonij olim ser Petrj de Bolognetis, nec non Herculj filio quondam Joannis olim predicti ser Petrj de Bolognetis Bonon. Civibus Salutem in domino, et gratiam nostram. Considerata horrenda et inaudita ruina domus predictorum olim dominj Antonij, et Joannis parentum vestrorum; que ex inopinato quodam casu, et lapsu cuiusdam Turris ex opposito et penes Carrobium, et Residentiam Mercatorum existentis de mense Martij proxime preteriti tota subito prostrata et solo equata fuit, et sub qua ipsi dominus Antonius et Joannes patres vestrj antedicti cum ambabus familijs suis perierunt et extincti fuerunt, Vobis tribus dumtaxat exceptis: quì cum quibusdam sororibus vestris superstites servati fuistis, vobis compatientes. Decrevimus his : quibus possumus, vos beneficijs et commodis prosequi: ut tantam calamitatem, et quasi incredibile infortunium facilius ferre possitis, Auctoritate igitur prefati Reverendissimi domini Legati qua fungimur, ac officij nostrj, et omni alio meliori modo, jure, via, causa et ,forma, quibus magis et melius possumus aut debemus, de consensu et voluntate magnificorum dominorum Sexdecim Reformatorum Status libertatis Civitatis Bon. volumus, ac decernimus et statuimus, quod vos filij et heredes dominj Antonij predicti per hoc presenti anno habere debeatis Salarium lecturae predicti patris vestrj ad quam rotulatus et conductus erat: quod est librarum quingentarum bononinorum, que ad vos dumtaxat spectare debeant, nec eas cum aliquo participare teneaminj. Hoc vero presenti anno elapso volumus et decernimus, quod vos, heredes domini Antonij et heredes Joannis predicti habere debeatis de pecunijs Gabelle grosse Civitatis Bononie libras quingentas bon. quolibet anno usque ad annos quattuor in totum : que ascendunt ad summam librarum duorum millium bon. ultra Salarium presentis anni, Mandantes Depositario dominorum Doctorum et aliorum in studio Bonon. legentium, seu depositario Gabelle grosse antedicte et alijs, ad quos quomodolibet spectare posset, quatenus omni exceptione remota congruis, et debitis temporibus predictas pecuniarum quantitates solvere debeant seu solvi faciant cum effectu vobis heredibus domini Antoni et Joannis antedicti modo et forma predictis. Ceterum ut gratiam nostram erga vos et cuiuslibet vestrum familias uberius extendamus: Vos Jacobummariam, Ludovicum et Herculem supradictos, et quemlibet vestrum cum familijs vestris, quas pro tempore habueritis eximimus, ac liberamus, exemptosque ac immunes et liberos facimus ab omnibus et singulis Datijs Comunis Bononie pro tempore viginti annorum inchoandorum post finitam locationem Datiorum predictorum; que ad presens locata sunt. Declarantes et volentes, quod sal vobis darj et tradì debeat a salari Comunis Bonon. pro usu vestro et familiarum vestrarum ad rationem soldorum Quadraginta bon. pro corbe, cum hoc, quod ad presens evacuarj faciatis viam publicam apud Carrobiam, et Residentiam Mercatorum supradictorum ob supradictam ruinam terreno, ac lapidibus plenam, et occupatam, et quod pro ornamento Civitatis domos vestras collapsas honorifice, et laudabiliter reedificare debeatis: pro ut visum fuerit magnifico domino Joannj de Bentivolijs. Mandantes magnifico domino Potestati Civitatis Bonon. Judici Datiorum Honorabilibus dominis Defensoribus haveris et Jurium Camere Bonon., ac omnibus, et singulis conductoribus Datiorum predictorum, caeterisque, ad quos quomodolibet spectat, et in futurum spectare posset, sive datia ipsa locentur, et vendantur, sive in camera remaneant. Quatenus presens nostrum exemptionis Decretum, et omnia et singula in eo contenuta inviolabiliter observent et ab alijs firmiter observarj faciant, sub prefati Reverendissimi dominj Legati, et eius successorum indignationis pena, decernentes irritum, inane, et nullum esse: si quid contra predicta aut aliquod predictorum ullo unquam tempore factum fuerit, sive gestum, legibus, juribus, statutis ac provisionibus Comunis Bonon. et pactis Campionis, Capitulis Datiorum predictorum tam factis, quam faciendis, et alijs quibuscumque in contrarium quomodolibet facientibus, non obstantibus, etiam his de quibus habenda fuisset mentio specialis et expressa, seu quorum tenor presentibus inserj debuisset. Quibus omnibus et singulis nostro proprio motu, et ex nostra certa scientia, quo ad predicta tamen, et pro hac dumtaxat vice specialiter et expresse derogamus, ac derogatum esse volumus et mandamus per presentes. In quorum fidem, robur et testimonium presentes fieri et nostrj consueti sigillj iussimus impressione munirj. Datum Bononie in palatio Residentie nostre, die Tertio decimo Maij anno a nativitate dominj nostri Yhesu Christi Millesimo quadringentesimo octuagesimo quarto: pontificatus vero Sanctissimj Christo patris et dominj nostrj, domini Sixti divina providentia pape quartj anno tertio decimo.
JOANNEBAPTISTA PHANENSI.
Lib. 20 Mandatorum fol. 108.