Það sem til þarf er:

F. 4

250 gr. kastaníu sveppir, þvegnir og skornir í sneiðar

3 msk. smjör

1 skarlottulaukur, saxaður  mjög fínt

Sjávarsalt og nýmalaður svartur pipar

1/2 tsk. þurrkað timían

1 msk. tómat mauk

1 tsk. nautakrafts duft frá Oskar

1 tsk. hreindýrakraftur í dufti frá Oskar

1/2 bolli vatn

1/3 bolli Marsala vín

3 msk. rjómi

2 msk. fínt söxuð steinselja

Frábær með öllum steikum

Þessi er frábær, skal ég segja þér.  Gamla góða rjómasveppasósan er mjög góð, enginn a setja hana niður, ennnn... þessi er allt önnur Ella.  Hún passar frábærlega með góðri steik, nauta eða lamba.  Endilega prófaðu sósuna þú verður ekki fyrir vonbrigðum ;-)

Svona geri ég:

Það er best að gera sósuna í tveim þrepum.  Fyrst eru sveppirnir, síðan eru steikurnar steiktar í sömu pönnu, síðan er sósan kláruð á meðan steikurnar eru hvíldar.

Sveppirnir eru steiktir á góðum hita, í smjörinu, síðan eru þeir teknir af og steikurnar steiktar á pönnunni.  Síðan er skarlottulaukurinn  brúnaður létt á pönnunni, það má bæta smjöri á pönnuna ef hún er of þurr.  Síðan er sveppunum ásamt öllum safa af þeim bætt á pönnuna og öllu blandað saman.  Saltað, piprað og timíaninu bætt við.  Tómatmaukinu er bætt á pönnuna og því leyft að steikjast aðeins, áður en því er blandað við sveppablönduna.  Síðan er kjötkraftinum bætt út á ásamt vatninu og víninu og látið sjóða saman, þar til þykknar. Þá er rjómanum bætt út í og steinseljan sett út í, í lokin.  Borin heit á borðið með steikunum.

Verði þér að góðu :-)