Tartalettur með kjúlla og grænmeti
Það sem til þarf er:
F. 4
2 stórar bökunarkartöflur
1 stór laukur
3 sellerí stilkar
300 gr. gulrætur
2 hvítlauksrif
600 gr. eldað kjúklingakjöt
1-2 dósir Campell's kjúklingasúpur
KJúklingakrydd
Kjúklingakraftur
Sjavarsalt og nýmalaður svartur pipar
1 askja Tartalettur
ATH. Ef þú átt annarskonar grænmeti,ferkar kryddjurtir, eða afgang af rjóma, er upplagt að nota það út í jafninginn
Þessi réttur hérna, er sko margreyndur og mikill uppáhalds skútumatur, hjá okkur GM. Það sem er svo frábært við hann að hann er einfaldur í undirbúningi, (enda veitir ekki af, þegar maður er að elda út á sjó og hallinn á bátnum er um 25-30°) Það er ekkert flókið í honum, hann er kósý, hlýjar þér þegar það er kalt og setur kjöt á beinin. Svo er hægt að tjútta hann upp, ef þú átt auka grænmeti eða ferskar jurtir sem þú þarft að klára. Það má t.d. nota afganginn af jólakalkúninum í staðinn fyrir kjúkling. Endilega prófaðu :-)
Svona geri ég:
Kartöflurnar eru skornar í teninga, laukurinn saxaður og hvítlaukurinn pressaður. Gulræturnar eru þvegnar og skornar í bita. Selleríið er skorið í þunnar sneiðar. Olía er hituð á rúmgóðri pönnu á meðalhita, grænmetið er steikt á pönnunni, þar til laukurinn er mjúkur og grænmetið rétt að byrja að brúnast, saltað og piprað. Þá er það tekið að pönnunni og sett til hliðar. Kjötið steikt í smá stund og kryddað með góðu kjúklingakryddi, salti og pipar. Öllu blandað saman og tekið af hitanum. í rúmgóðum potti eru 1-2 dósir af kjúklingasúpu og 1/2-1 dós af vatni, eða blöndu af vatni og rjóma hitað og hrært vel saman. Kjötinu og grænmetinu er hellt út í og blandað vel saman. Þú getur bætt meiri vökva í ef sósan er of þykk. Kryddað til með kjúklingakrafti og kryddum og látið malla saman í 10-15 mín. Tartaletturnar eru hitaðar og bornar á borðið með sósunni.