Flamberuð nautasteik með rjóma sveppasósu

Það sem til þarf er:

F. 4

6-800 gr. nautakjöt prime ribí nokkuð þykkum sneiðum

1 1/2-2 tsk. svört piparkorn (má vera meira ef þú vilt), gróf mulin í morteli

Sjávarsalt

2-3 msk. Koníak eða Armaníak

1 1/2 box kastaníu sveppir, í sneiðum

1/2 L rjómi

Nautakrafur, ég nota frá Fond

Smjör til að steikja uppúr

Ólívu olía

Meðlæti:

Þykkt skornar franskar kartöflur

Ég ætla svona í ganni, að henda því fram hérna, að það er fátt betra en góð steik með frönskum og góðri sósu. Eins og það er einfaldur réttur, tikkar hann í svo mög box, alla vega hjá mér og mínum. Þessi steik hefur fylgt okkur í áratugi, en mér hefur ekki dottið í hug fyrr en núna, að setja hana á blað. Eflaust átt þú einhverja svipaða uppskrift, en ef ekki skora ég á þig að prófa þessa, hún er mjööög góð :-)

Svona geri ég:

Ég tek steikurnar úr ísskápnum að morgni og læt þær standa undir plastfilmu á eldhúsborðinu til kvölds. Ofninn er hitaður í það hitastig sem frönsku kartöflurnar eiga að steikjast á, þær síðan settar í ofnskúffuna og steiktar. Ólívu olíu er nuddað á steikurnar, svörtu piparkornin eru mulin gróft í morteli og þeim er nuddað ofan í steikurnar ásamt grófu salti. Stór rúmgóð panna er hituð á vel rúman meðalhita. Ca. 2 msk. af smjöri er brætt á pönnunni og smávegis af olíu bætt út í svo smjörið brenni síður. Þegar pannan er vel heit, eru steikurnar settar á hana og steiktar í 1-2 mín., eftir því hvað þær eru þykkar og hvernig þú vilt hafa þær steiktar. Steikunum er snúið við og smávegis af smjöri bætt á pönnuna ef þarf og þær steiktar á hinni hliðinni. Koníakinu er hellt á pönnuna og eldur er borinn a því svo það logi, pannan hrist varleg til svo eldurinn deyi niður, farðu varlega, ekki brenna neitt. Steikurnar eru teknar af pönnunni og settar á disk og álpappír settur yfir og þær látnar hvílast í 5-10 mín., alls ekki hella smjörinu af pönnunni. Á meðan býrð þú til sósuna, 1-2 msk. af smjöri er bætt á pönnuna og sveppirnir eru steiktir upp úr því, skánin á pönnunni, er skafin upp í sveppina, hún er gulllið sem gefur góða bragðið. Þegar þeir eru steiktir er rjómanum hellt á pönnuna og sósan krydduð til með nautakrafti, salti og pipar. Borið fram með frönsku kartöflunum og glasi af góðu rauðvíni.