Það sem til þarf er:

F. 4

Deigið:

175 gr. hveiti

100 gr. ískalt smjör

1 eggjarauða

4 msk. ískalt vatn

Eða:

1 pakki tilbúið bökudeig (rúlla eða pakki sem þarf að hræra út skv. leiðb. á pakka)

Fyllingin:

2 msk. Dijon sinnep

250 gr. bacon

175. gr. Óðalsostur

3 dl rjómi

 4 eggjarauður

 Nýmalaður svartur pipar og nýrifin múskathneta

Salt (smakka til)

Meðlæti:

Stökkt grænt salat

Nú erum við að tala um alvöru góðgæti.  Quiche Lorraine, með stökku grænu salati og glasi af góðu rauðvíni er frábær réttur, til að gæða sér á, þegar komið er heim í kvöld og helgarfríið framundan...... ó mæ :-)  Það er hægt að stytta sér leið, með því að kaupa gott bökudeig, en, lang best er að búa deigið til sjálfur, það breytir bökunni úr góðri í frábæra.  Deigið er auðvelt, svo sláðu til og búðu að til :-)

En svona gerum við:

Deigið:  Ofninn er hitaður í 200°C.  24 cm, lausbotna pie form eða eldfast pie form, er smurt vel að innan.  Hveitið er sett í rúmgóða skál.  Smjörið er skorið í litla bita og sett í skálina, með hveitinu.  Síðan er smjörinu nuddað inn í hveitið, með fingrunum, þar til það er gróflega blandað saman við.  Eggjarauðan er sett í glas, ásamt vatninu og þeytt létt saman, síðan er því hellt í hveitiskálina.  Hnoðað létt þar til deigið hangir saman, þá er því hellt á hveitistráð borð og hnoðað í samfellda, slétta kúlu.  Hún er flött út með kökukefli og rúlluð út í hringlaga köku, sem er svolítið stærri en formið.  Deiginu er rúllað upp á kökuleflið og rúllað yfir formið.  Deiginu er komið fyrir ofan í forminu og umframdeig er skorið af, rétt fyrir ofan kantinn.  Smjörpappír er settur ofan í formið og bökunarkúlum eða þurrkuðum baunum, er hellt í botninn og botninn bakaður "blint" í 15 mín.  Þá er pappírinn með baununum tekinn upp ur forminu og botninn bakaður áfram í 5 mín., kældur í 30 mín., áður en skelin er fyllt.

Tilbúið pie deig:  Bökudeiginu er rúllað út og því komið fyrir í smurðu eldföstu pie formi eða í lausbotna pie formi. (Tibúna deigið þarf ekki að baka, áður en það er fyllt).

Fyllingin:  Ofninn er hitaðurí 200°C.  Bacon er sett á bökunarplötu með pappír á og steikt í ofninum í ca. 15-20 mín., eða þar til það er vel brúnað.  Það er gott að setja það á eldhúsblað í smá stund, svo fitan leki af backoninu.  Hitinn er lækkaður í 190°C. Sinnepinu er smurt á botninn á deiginu og  baconinu raðað ofaná. Óðalsosturinn er skorinn í sneiðar og raðað ofan á baconið.  Eggjarauðum og rjóma er þeytt saman og smakkað til með nýmöluðum svörtum pipar, nýrifinni múskathnetu og salti (passaðu þig á saltinu, bæði baconið og osturinn er salt). Blöndunni er hellt yfir allt saman, stungið í ofninn og bakan bökuð, í 40 mín.   Borin á borð með stökku grnu salati.  Bakan er góð heit eða köld og frystist vel, bökuð.  

Verði þér að góðu :-)