Laxa kökur
Það sem til þarf er:
Ca. 10 stk.
1/3 bolli blandaðar kryddjurtir (t.d. steinselja, basil, kóríander, dill), saxaðar
2 bollar soðnar kaldar kartöflur, maukaðar með gaffli
250 gr. soðinn eða bakaður lax, losaður í sundur með gaffli
2 1/2 bollar panko brauðrasp, skipt
4 stór egg, skipt
2 tsk. salt
1 tsk. nýmalaður svartur pipar
3/4 bollar hveiti
Olía til að steikja upp úr
Hvítlauks-dill sósa:
2 hvítlauksrif, fín söxuð
1/2 tsk. salt
1 bolli sýrður rjómi
1/4 bolli saxað ferskt dill
Svartur pipar
Þessar laxa kökur eru svooo góðar. Þær eru létt kryddaðar með jurtum, lungamjúkar að innan, með stökkum panko hjúp að utan og geggjuð hvítlauks-dill sósa til að toppa dásemdina með. Það er upplagt að nota afganga af laxi og soðnum kartöflum í kökurnar og ég veit að krakkarnir eiga eftir að elska þær. Endilega prófaðu!!!
Svona geri ég:
Kökurnar: Kryddjurtirnar eru saxaðar. Kartöflurnar eru maukaðar og laxinn losaður í sundur með gaffli, sett í skál með kryddjurtunum og 1 bolla af panko raspi, 2 eggjum, salti og pipar, blandað vel saman. Restin af panko raspinu er sett í djúpa skál, 2 egg er slegin í aðra skál og hveitið er sett í eina enn. Laxamaukið er mótað í ca. 10 kökur og síðan velt upp úr hveiti, þeyttu eggi og síðast raspinu. Kökurnar eru settað á pappírsklædda plötu og látnar standa undir plasti í kæli í 30 mín., eða lengur. Olía er hituð á stórri pönnu á meðalhita. Steiktar í ca. 3 mín, á hvorri hlið, eða þar til þær eru gylltar og gegn heitar. Bornar á borð með góðu salati og hvítlauks-dillsósunni.
Hvítlauks-dill sósan: Hvítlaukurinn og saltið er marið saman í morteli, eða með bakinu á hníf þar til hann er maukaður. Honum er hrært út í sýrða rjómann, ásamt dillinu, smakkað til með salti og pipar. Geymd í kæli þar til kökurnar eru steiktar.