Páskaterta

Það sem til þarf er:

F. 12-14

Í botninn:

80 gr. suðusúkkulaði

100 gr. hveiti

40 gr. kakó

100 gr. sykur

1 tsk. lyftiduft

1/4 tsk. salt

90 ml. olía

1 egg

90 ml. mjólk

80 ml. nýsoðið vatn

Í mússina:

200 gr. suðusúkkulaði

200 gr. mjólkursúkkulaði

4 egg, aððskilin

3 dl rjómi

Skraut:

Súkkulaði smá egg

Ferskir túlípanar

Þessi dásamlega páskaterta er ekki bara falleg, hún er draumur í munni. Það er hægt að gera hana 1-2 dögum áður en á að nota hana, sem er æði, þegar mikið stendur til, eins og t.d. stórhátíðir, fermingarveisla eða stórveisla fyrir fjölskylduna. Ég skora á þig að prófa hana :-)

Svona geri ég:

Botninn: Ofninn er hitaður í 160°C. 22 cm lausbotna form, er smurt að innan og pappír sniðinn í botninn og í háan hring, innan í formið, pappírinn er líka smurður. Súkkulaðið er brætt yfir vatnsbaði. Tekið af hitanum og látið kólna aðeins. Hveiti, kakói, sykri, lyftidufti og salti, er blandað saman í rúmgóðri skál. Olía og egg eru þeytt létt saman, í könnu eða skál, síðan er mjólkinni blandað saman við. Blauta hráefninu, ásamt brædda súkkulaðinu, er blandað saman við þurrefnin, síðan er soðna vatninu blandað út í. Deiginu er hellt í formið og sléttað úr því. Stungið í ofninn og bakað í 16-18 mín., eða þar til prjónn kemur nærri hreinn upp úr miðjunni. Formið sett til hliðar til að kólna svo til alveg.

Mússin: Báðar gerðir af súkkulaði eru bræddar yfir vatnsbaði. Tekið af hitanum og látið kólna í líkamshita. Eggjahvíturnar eru stífþeyttar í hreinni skál, settar til hliðar. Í annarri skál er rjóminn þeyttur í næstum því mjúka toppa, ekki ofþeyta rjómann. Eggjarauðurnar eru þeyttar upp í súkkulaðið, þá er þeytta rjómanum blandað saman við og í lokin er eggjahvítunum blandað varlega saman við súkkulaðirjómann. Mússinni er hellt í formið og jöfnuð út. Stungið í ísskápinn yfir nótt eða lengur. Þegar á að bera kökuna á borð, er hún tekin varlega úr forminu og pappírinn tekinn utan af henni. Skreytt að vild. Má frysta.