Lummur
Það sem til þarf er:
f. 4
300 gr. tilbúinn hafragrautur (má vera grjónagrautur)
100 gr. hveiti
1/2 tsk. matarsódi
1 egg
2 dl mjólk
1 dl rúsínur
Kardemommudropar eftir smekk
Smjör til að steikja uppúr
Meðlæti:
Sykur
Berjasulta, þessi sem þú bjóst til í sumar
Hvernig gat ég gleymt þessum litlu dásemdum???? Svo hrikalega einfaldar en svoooo góðar beint af pönnunni með sykri... OMG himnasæla :-D Ég bauð liðinu mínu í grautarlummur um daginn og ég gat ekki bakað nógu hratt, þær kláruðust um leið og þær snertu diskinn.
Svona geri ég:
Grauturinn er hrærður með písk, svo hann sé laus í sér og kekkjalaus. Þurrefnin eru sett saman í skál og hrærð útí grautinn til skiptis við eggið og mjólkina. Smakkað til með kardemommur og að lokum er rúsínunum bætt útí. Smjörklípa er brædd á pönnu, á rúmum meðalhita. Mér finnst mátulegt að setja 1 sósuausu af deigi í hverja lummu. Lummunum er snúið þegar loftbólur eru farnar að myndast í kökunni á pönnunni, þá er þeim snúið og steikt áfram þar til lummurnar eru gegnsteiktar 2-3 mín. Bornar fram beint af pönnunni með sykri eða góðri berjasultu.