Puttanesca bollur
Það sem til þarf er:
f. 4
Bollur:
250 gr. nautahakk
250 gr. svínahakk
1 stór laukur, rifinn
50 gr. nýrifinn Parmesan ostur
Sjávarsalt og nýmalaður svartur pipar
2 marin hvítlauksrif
Puttanesca sósa:
2 msk. ólífu olía
2 hvitlauksrif í þunnum sneiðum
1/4-1/2 tsk. þurrkaðar chiliflögur
1/2 tsk. fennelfræ, létt marin
1 dós saxaðir tómatar
1 dós kirsuberja tómatar
1 dl rauðvín
1 tsk. sykur
1-2 ansjósuflök
10 svartar ólífur, skornar í tvennt
1 msk. kapers
Meðlæti:
400 gr. penne, fusilli eða rigatone pasta, soðið skv. leiðb. á pakka
Ég mæli með því að búa til tvöfalda uppskrift af þessum bollum. Hér er á ferðinni einn af þessum réttum sem er svo gott að eiga til í frystinum, þegar tíminn er naumur, hann frystist vel og eina málið er bara að sjóða pasta og maturinn er kominn á borðið, elska svoleiðis!
Svona geri ég:
Ofninn hitaður í 180°C. Hakkið, rifinn laukurinn, parmesan osturinn og marði hvítlaukurinn er hnoðað saman í stórri skál, saltað vel og piprað. Formað í litlar bollur. 1 msk. af olíu er hituð á rúmgóðri pönnu og bollurnar brúnaðar, síðan eru þær teknar af pönnunni. Ég set bollurnar í ofninn í smá stund á meðan ég bý til sósuna svo óþarfa fita leki af þeim og þær fullsteikist. 1 msk. af olíu er bætt á pönnuna og hvítlaukurinn i sneiðum er steiktur á lágum hita í smástund, þá er chiliflögunum, ansjósum og fennel fræunum bætt útí og mallað í smástund. Næst er tómötum, rauðvíni og sykri bætt á pönnuna og látið malla í 10 mín., eða þar til sósan þykknar aðeins. Bollunum er þá bætt á pönnuna ásamt ólífunum og kapers og mallað áfram i ca. 10 mín., smakkað og kryddað til. Pastað er soðið skv. leiðb. á pakka. Borið fram með ferskum parmesan til að rífa yfir diskinn sinn og gott brauð ef þú vilt.