Rolo kökur með sjávarsalti
Það sem til þarf er:
ca. 40 stk
225 g mjúkt smjör
225 g sykur
2 eggjarauður
2 msk. mjólk
250 g hveiti
30 g kakó
¼ tsk. salt
um 4 pakkar Rolo
Sjávarsalt frá Saltverki eða Maldon salt
Þessar smákökur eru í miklu uppáhaldi hjá okkur um þessar mundir og ég er búin að baka þær nokkrum sinnum í sumar. Samsetning af súkkulaði, karamellu og salt kemur braðlaukunum á flug ... namm!
Svona bökum við þær:
Smjör og sykur þeytt létt og ljóst í hrærivél. Eggjarauðurnar eru settar í glas og þeyttar létt með gaffli, síðan er þeim bætt útí, smámsaman. Mjólkin er sett í glasið og hrærð lítillega og svo sett útí deigið og hrært áfram. Kakó og hveiti er sigtað saman og hrært varlega útí deigið með sleif. Síðan er deiginu pakkað í plast og það geymt í ísskáp í nokkra tíma eða yfir nótt. Ofninn er hitaður í 180°C, bökunarplötur gerðar klárar með pappír. Deiginu er rúllað á milli handa í kúlu á stærð við valhnetu, gott er að hafa sæmilegt bil á milli kúlnanna af því að kökurnar stækka dálítið. Einum Rolomola er síðan þrýst létt ofan á hverja kúlu og nokkrum kornum af salti sáldrað ofan á. Bakað í 12-15 mínútur eða þar til kakan virkar þurr og svolítið sprungin ofan á. Platan er tekin úr ofninum og látin standa í 5 mínútur áður en kökurnar eru teknar af plötunni og kældar á grind.