BLT samlokan
Það sem til þarf er:
F. 2
150 gr. gott bacon, steikt stökkt
1 stór og mjög vel þroskaður tómatur, skorinn i miðlungsþykkar sneiðar
4 sneiðar uppáhalds súrdeigsbrauðið þitt
Nokkur salatlauf
Majones
Smjör
Sjávarsalt og nýmalaður svartur pipar
Í dag er frekar grár og lítið spennandi dagur hér í Lissabon. Mig langaði í eitthvað djúsí og gott í hádegismat, ég hreinlega nenni ekki salati í dag. Ég kíkti í ísskápinn, til að sjá hvort eitthvað leyndist þar, svo ég gæti látið eftir þessari löngun minni. Eftir að hafa rótað í hillunum fann ég akkúrat það sem mig langaði í og gat búið til. Bingó.... BLT samloka.... ÓMG!!! Ef þú þekkir hana ekki, leyfðu mér þá að kynna hana fyrir þér, hún gæti orðið næsta uppáhalds sukkmaturinn þinn á gráum degi, eða hvaða degi sem er :-)
Svona geri ég:
Ofninn er hitaður i 200°C. Bökunarpappír er settur á bökunarplötu og bacon sneiðunum er raða í einfalt lag á pappírinn. Baconið er steikt í ca. 15-20 mín. , þar til það er alveg stökkt. Þá er það tekið af plötunni og sett á eldhúspappír og látið kólna. Önnur hliðin á hverri brauðsneið er smurð með þunnu lagi af smjöri og sú hlið er steikt á mjög heitri pönnu þar til hún er gulbrúnt og steikt. Tómatarnir eru þvegnir vel og þerraðir, síðan skornir í miðlungsþykkar sneiðar, saltaðar og pipraðar. Steiktu hliðarnar á brauðsneiðunum eru smurðar með góðu lagi af majónesi (ekki vera nísk) síðan er baconinu dreift á milli tveggja sneiða, tómatarnir eru settir ofan á, síðan er salatið lagt ofan á tómatana og í lokin er hin brauðsneiðin lögð ofan á og þrýst létt niður á hana. Hver samloka er skáskorin í tvennt, lögð fallega á disk og notið í botn.