Grísalundir Provence með bökuðum tómötum
Það sem til þarf er:
f. 6
2 vænar grísalundir, snyrtar og skornar í þykkar steikur
300 gr. beikon, sneiðarnar skornar í 3 bita hver
300 gr. sveppir í sneiðum
1-1 1/2 dl rauðvín
1/2 L rjómi
Hvítlauksduft
Salt og pipar
Herbes de Provance frá Pottagöldrum
Eðal kjúklingakrydd frá Pottagöldrum
Smjör og olía til að steikja úr
Bakaðir tómatar:
6 tómatar
3 msk. smjör
2 msk. söxuð steinselja
Salt, pipar og hvítlauksduft
Meðlæti:
Hvítlauksbrauð
Hrísgrjón
Strengjabaunir
Þessi réttur er byggður á uppskrift úr gömlum Gestgjafa. Hann er einn af þessum réttum sem maður gerir aftur og aftur, enda klikkar hann ekki.
En svona er aðferðin:
Lundirnar eru snyrtar og skornar í þykkar steikur og flattar lítillega með hnúunum, svo eru þær kryddaðar með hvítlauksdufti, Herbes de Provance, kjúklingakryddinu, salti og pipar. Það er ágætt að láta þær standa með kryddinu í svolítinn tíma ef þú getur. Steikurnar eru svo brúnaðar á báðum hliðum á vel heitri pönnu uppúr blöndu af smjöri og olíu, svo eru þær teknar af pönnunni og geymdar í eldföstu fati. Á sömu pönnu er beikonið brúnað í smástund, og það svo tekið af pönnunni og dreyft ofaná steikurnar, og að síðustu eru sveppirnir steiktir á pönnunni og settir ofaná beikonið. Rauðvíninu er hellt á heita pönnuna og soðið miður um helming, og passaðu að skrapa allt sem er fast á pönnunni vel upp í rauðvínið svo ekkert fari til spillis af góða bragðinu. Svo er hitinn lækkaður og rjómanum bætt útí og soðið niður í smástund, smakkað til með kryddi og svo hellt yfir kjötið. Svona getur þú látið réttinn bíða í ísskáp til kvölds, ef þú gerir hann fyrirfram. Ofninn er hitaður í 180°C og rétturinn bakaður í 20 mín.
Tómatar:
Tómatarnir eru þvegnir og skornir í tvennt. Kryddað ofaní sárið með salti, pipar og hvítlauksdufti, svo er klípu af smjöri og steinselju dreyft yfir. Bakað í sér fati um leið og þú bakar lundirnar í ofninum.
Borið fram með hvítlauksbrauði, soðnum hrísgrjónum og strengjabaunum.