Súkkulaðiegg með hvítsúkkulaði mousse
Það sem til þarf er:
f. ca 8-10
Í súkkulaðieggin:
8-10 vatnsblöðrur eða litlar venjulegar blöðrur
150 gr. dökkt súkkulaði, saxað
Í hvítsúkkulaði moussina:
250 gr. hvítt súkkulaði
2 msk. ósalt smjör
1 1/4 bolli mjólk
3 stórar eggjarauður
3 msk. sykur
2 msk. maismjöl
3 blöð matarlím, mýkt upp í köldu vatni
1 bolli rjómi, þeyttur
Þegar ég var í Árósum um daginn gerðum við Inga dóttir mín svona súkkulaðiegg í eftirrétt fyrir okkur öll, til að setja punktinn yfir Iið á yndislegri steikarmáltíð. Stökkt dökka súkkulaðið í eggjunum með hvítsúkkulaði moussinni var hreinn unaður :-) Það er miklu minna mál að gera þennan efirrétt en sýnist. Eggin má gera 1-2 dögum áður, en ekki geyma þær í ísskáp, heldur á svölum stað undir plasti.
En svona gerum við:
Bakki með bökunarpappír er gerður klár. Súkkulaðieggin eru gerð þannig, að blöðrurnar eru blásnar upp í stærð sem þér finnst hæfileg, ca. eins og tebolli, og hnýtt fyrir endann á þeim. Þær eru síðan stroknar með rökum klút og látnar þorna. Dökka súkkulaðið er brætt í vatnsbaði, og mesti hitinn látinn rjúka úr því. Blöðrunum er síðan dýft í súkkulaðið og þeim velt í því svo það myndist einskonar túlípana mynstsur. Það er gott að vera með litla sleikju til að strjúka súkkulaðið yfir og jafna það út. Húðuðu blöðrurnar eru síðan settar á bakkann þar til súkkulaðið er alveg harðnað. Þá er blaðran stungin með nál við hnútinn og loftið látið leka rólega úr henni. Ekki hjálpa til :-) :-)
Hvítsúkkulaði moussin:
Matarlímið er lagt í bleyti í kalt vatn. Hvíta súkkulaðið og smjörið er sett saman í skál, með sigti ofaná. Mjólkin er hituð í meðalstórum potti, rétt að suðu. Í annarri skál eru eggjarauður, sykur og maismjöl þeytt saman og heitri mjólkinni þeytt útí eggjablönduna, því er svo hellt í pottinn aftur og þeytt þar til blandan þykknar, ca. 4 mín. Tekið af hitanum. Vatnið er kreyst úr matarlíminu og því hrært útí þar til það uppleyst. Blöndunni er hellt í gegnum sigti yfir hvíta súkkulaðið og smjörið og hrært í þar til súkkulaðið er bráðið, kælt í stofuhita. Rjóminn er þeyttur og blandað varlega saman við súkkulaðið og kæl í ísskáp í nokkra tíma. Má gera daginn áður, en setja saman samdægurs.
Til að bera fram:
Hvítsúkkulaði moussin er sett í sprautupoka með stórum stút og henni sprautað jafnt í eggin. Skreytt með sköfnu dökku súkkulaði og hindberjum. Geymt í ísskáp þar til þú vilt bera réttinn á borð.