Rækjubrauðterta með
Corn Relish
Það sem til þarf er:
F. 6-8
1 formbauð
1 dós sýrður rjómi
400 gr. majónes
5 harðsoðin egg, söxuð
1 dós grænn aspas
250 gr. afþýddar rækjur + meira til að skreyta með
1/2 krukka Corn Relish, frá Stonewall Kitchen + meira til að skreyta með
Til að skreyta með:
Gúrka
Litlir tómatar
Rækur
Söxuð steinselja
Þessi gamla góða :-) Ég gæti næstum því sagt að uppskriftin sé jafngömul mér, en ég geri henni það ekki, hún er eitthvað yngri ;-) Mamma gerði þessa brauðtertu oft, þegar það var boðið í sunnudagskaffi heima, eða afmæli og hún sló alltaf í gegn. Corn Relish er kryddmauk, með korni að sjálfsögðu og spicy karrí bragði, mjög gott. En, svo var allt í einu var hætt að flytja inn, þetta dásamlega kryddmauk og þá var engin brauðterta lengur :-( En, þegar farið var að flytja inn vörur frá Stonewall Kitchen, sá ég þessa dásemd í hillunni í búðinni og þá varð Anna B. glöð og fór með krukku heim.
Svona geri ég:
Sýrður rjómi og majónes er þeytt saman í stórri skál. Harðsoðnu eggjunum, rækjum, aspas og Corn Relish er hrært út í majónesið, smakkað til. Skorpan er skorin af brauðsneiðunum og brauðið tætt niður og hrært út í majónesblönduna. Maukið er sett í leir eða gler pæform, eða í skál, með háum köntum og sléttað úr því. Plast filma er sett yfir formið og því stungið í ísskápinn yfir nótt. Formið er tekið úr ísskápnum og svo skreytir þú brauðtertuna eins og þú vilt. Borin á borð með stórri skeið.