Súrdeigs grunnur
Það sem til þarf er:
Rúgmjöl
Hveiti
Vatn
2-3 rúmgóðar glerkrukkur með loki
Er nokkuð betra en að eiga gæludýr í krukku sem gefur og gefur, þegar gerskortur er að setja allt a hliðina? Ég er auðvitað að tala um súrdeigs grunn. Það er ekki mikið mála að gera grunninn, nema smá þolinmæði og tíma. Brauðin sem hægt er að baka úr grunninum eru engu lík, hreinlega laaaaang best. Ég gæti skrifað lengi um ágæti súrdeigsbrauða, en þú mundir örugglega ekki nenna að lesa það, heldur viltu koma þér að verk, er það ekki? Nú byrjar fjörið ;D
Svona gerir þú:
Á fyrsta degi blandar þú 50 gr. af rúgmjöli með 80 gr. af volgu vatni og lætur það standa á borðinu í rúmgóðri glerkrukku með lokið laust skrúfuðu á, í 24 tíma á volgum stað i eldhúsinu.
Á öðrum degi blandar þú í grunninn 50 gr. af rúgmjöli og 80 gr. af volgu vatni og lætur það standa áfram í lauslokaðri krukkunni á borðinu í 24 tíma.
Á þriðja degi blandar þú aftur í grunninn 50 gr. af rúgmjöli og 80 gr. af volgu vatni og lætur það standa áfram í krukkunni á borðinu með lokið laust skrúfað á í 24 tíma.
Á fjórða degi skaltu vigta 50 gr. af grunninum og setja hann í hreina rúmgóða krukku og blanda í hann 80 gr. af volgu vatni og 50 gr. af rúgmjöli og láta standa á eldhúsborðinu í 24 tíma með lokið lausskrúfað á krukkunni.
Á fimmta degi ættir þú að vera farin að sjá loftbólur í grunninum og þá er komi að því að "mata" þú grunninn í fyrsta sinn. Þá blandarðu saman 50 gr. af rúgmjöli og 50 gr. af hveiti í litla skál. Vigtaðu 40 gr. af grunni og settu í hreina rúmgóða krukku og hrærir út í hann 140 gr. af volgu vatni og mjölblöndunni, með gaffli. Lokið er skrúfað lauslega á krukkuna og hún látin standa á borðinu í 12 tíma. Grunnurinn ætti að lyfta sér upp og stækka um nánast helming. Svona "matar" þú grunninn á milli þess sem þú notar hann. Þú getur breytt hlutföllunum á þessu stigi og haft eingöngu hveiti í grunninum, en mér finnast þessi hlutföll best, til að grunnurinn fái góða næringu 8meiraaf náttúrulegum gerlum í rúg en hveiti) og mér finnst rúgurinn gefa gott bragð, þó það sé svona lítið af honum. Ef þér finnst grunnurinn vera slappur og ekki lyfta sér almennilega, getur þú gefið honum smá "adrenalín" með því að setja 1 tsk. af Organic Balrley Malt Extract, út í eina "mötunina" þá ætti hann að hressast við. Það er gott að setja miða á krukkuna með dagsetningunni sem þú "mataðir" grunnin á ef þú geymir hann lengi.
Nú getur þú prófað hvort grunnurinn er tilbúinn til að baka úr með því að taka 1 tsk. af honum og láta hann detta í glas af vatni. Ef hann flýtur er hann tilbúinn til að baka úr. Ef ekki, þá skaltu fóðra hann aftur eins og í 5. lið. Ef þú bakar oft lætur þú grunninn standa á borðinu og "matar" hann daglega. Ef þú bakar sjaldan, eins og ég, skaltu geyma grunninn í ísskápnum og "mata" hann einu sinni í viku, eða á 10 daga fresti.
Það er upplagt að safna saman og geyma það sem verður afgangs af grunninum eftir "mötun" í stórri krukku í ísskápnum. Það má nota hann til að búa t.d. til dásamlegar súdeigsvöfflur eða morgunverðar pönnukökur.