उत्तराखंड के कलम वीर
'''''नड़ाक'/नाक लगाण'''''
बल जैक नाक हूंद वै कि सिरड्या मा नाक लगद या वे फरि नड़ाक लगद अर नाक लगणा बाना भि कतगै हूंदि !
अजगाळ कतगै लोग जै कै का
ग्वाळ गुसैं अफि बणदि अर अफि नराज ह्वेकि या ठूँणू फरि ऐकि थुथुरु भि उस्यै/फुल्यै दिंदि मल्लप नड़के जंदि ।
कैका स्वागत मा टीका पिठै मा जरा अबेर ह्वेगे या अंक्वै नि ह्वे त वे फरि नड़ाक लैजांद !
कैथै बुलयुं नि च अर वो पिरोग्राम मा पौंछिगे यदि वे तै मंच मा नि चढ़ा य वेकु नौ आयोजन वलुं ल मैका पुटुग बटि क नि ल्हेत बल वेकि भि नड़ाक लैजांद !
यदि वैथै मंच मा जगा भि मिलीगे अर भिंड्या देर तै वैथै माइक फरि नि बिल्कण दे त तब भि वेकि नड़ाक लैजांद !
ब्वारि ल जरा सासूजी क बात पलटि कै तड़म जबाब दियाल त सासूजी फरि नड़ाक लैजांद !
या
ब्वारि कै काम फरि मिसि चा अर सासूजी ल एक काम होरि बतैयाल त फिर ब्वारि फरि भि नड़ाक लैजांद !
नौना खुणि ब्योलि खुज्याण मा जरा ब्वै बाब नौनाकि सला नि ल्या त नौनु/ब्योला फरि नड़ाक लैजांद !
ब्यो मा खूभ धूमधाम हुंईं हो ब्योला दगडयों नचणा सज अयुं हो ढ़ोल दमौ बैंड डीजे अफ अफकै घुरकणा हो नचाड़ चौतर्फि फरकेणा हो अर
ब्योलि ब्योला कु खांद मा खैयुं हो त सरग सिरड़े जयेंद अर वो सबतै कत्तल रुजै भिझै जांद किलैकि वेफरि भि नड़ाक लैजांद !
लैंदी गौड़ि उज्यड़ा हो अर कै परया मौ कु उज्याड़ खैकि अपड़ा गुसैंयुं तै ल्वड़ै-ग्वड़ै कि गाली खवै द्यावो अर सिरड्या मा गुसैंण गौड़ि तै हणसट बणै द्यावो अर गौड़ि वे दिन बटि दूध दीण मा कमति करण बैजावा त समझि जावादि कि गौड़ि फर भि नड़ाक लैजांद !
गुर्जि कु पाठ्यक्रम पूरु कराणा बान अदा काम घारम खुणि दियुं हो अर इस्कूल्या नौन्याळ अलझेट समझि काम निकारा अर तब गुर्जि सिरड्या मा जण्येक तै लमसट कैद्या त इन समझादि कि गुर्जि क भि नड़ाक लैजांद !
कै मौ क जागर उर्ययां ह्वा धामी भि जणगुरु हो अर सौक भगतौ कु एकमन एकचित्त नि हो त द्यब्तौं फरि भि नड़ाक लैजांद !
चुनौ बगत हो अर उम्मीदवार ल वोटर तै मुर्गा-सुर्गा, घुट्टी- घट्टी लैक नि पूछू त चुनौ रिजल्ट म उम्मीदवार क जमानत जप्त भि ह्वेजांद अर यांक मल्लप भि वोटर तै परत्यासी से नड़ाक लैजांद ! 🤣
क्रिकेट मैच मा डकवर्थ लुईस नियम क वजै से जो टीम बरखा आण से पैलि जितणि रैंद अर अचणचक हैरि जांद त हरण वलि टीम अर वींका परशंसकों फरि नड़ाक लैजांद !
अचगाळ भारत अर अमेरिका क्वी द्विपक्षीय डील फैनल कर्दि त चीन अर पाकिस्तान फरि नड़ाक लैजांद !
यदि चीन पाकिस्तान क मसूद अजहर तै संयुक्त राष्ट्र संघ मा वीटो पावर से बचांद अर नेपाल तै भारत क खिलाफ भड़कांद त भारत फरि नड़ाक लैजांद !
यदि उ.कोरिया कु तानाशाह किम जोंग अमरिका तै धमकांद फिर राष्ट्रपति ट्रंप दगड़ लंच डिनर खांद अर फिर ट्रंप क ब्वल्युं नि मनदु त सर्या अमेरिका फरि नड़ाक लैजांद !
✍🏻ल्यख्वार -
©®✍🏻वीरेंद्र जुयाल उपिरि
फरसड़ी पलतीर क्लब
दिनांक- 20-06-020.