वो अपड़ि संगरांद अफि बजाणा क्य ब्वन तब ।

ढ़स्स ढ़सुगु मारि आँखा घुर्याणा क्य ब्वन तब ।।

सरगा की माया कैल जाणि साक साख्यूं बटि ।

घाम पाणी ह्यूँ ढ़ाँडू बरखाणा क्य ब्वन तब ।।

जौंकु कपाल पैलि हुंयुं दुमंजिलु बढ़अदमै मा ।

वो अपड़ि पीठ अफि कन्याणा क्य ब्वन तब ।।

आंदा दिन जांदी रात कैसे भि थमेंदा नि छन ।

धर्ति अगास इन सब्तै बिंगाणा क्य ब्वन तब ।।

एक मुंड़ मा सौ सौदा माया मोह लेपण लगिं ।

मनखि बण्युं खाड़ू सौ उच्यणा क्य ब्वन तब ।।

करमा लेख प्रभु माया अर दैव छाया हूंदि छैंच ।

चैत भादौ लोग मसाण पुजाणा क्य ब्वन तब ।।

जो काजौळ ढंड़ियुंद नक्सा द्यखणा मुखड़ि कु ।

पाणी छोळि वो नौणि खुज्याणा क्य ब्वन तब ।।

बेमतलबा का जंगमजंगा भै रोज भला नि हूंदा ।

गरुड़ू घेंटुड़ा अब ढाँगा गमजाणा क्य ब्वन तब ।।

✍🏻ल्यख्वार -

©®✍🏻वीरेंद्र जुयाल उपिरि

फरसड़ि पलतीर क्लब

दिनांक- 30-05-020.