म्यारा डांडा-कांठा की कविता

हमतैं रोजना ठगाणा छन ।

भाषणों फूल सूंघाणा छन ।।

बजटों छकै् उज्याड़ खैकि ।

लोकतंत्रा घंटी बजाणा छन ।।

चल्दा इस्कोलों ताळा लैगिं ।

कै शिक्षा ज्ञान बटाणा छन ।।

गूंणी बंदरों आजादी देकि ।

मनख्यूं भैर भजाणा छन ।।

मोळा माद्यो देवभूमि बणि ।

वोटों मांगल लगाणा छन ।।

बीस सालम् कतग विकास ।

अंध्यरम तीर चलाणा छन ।।

माया तामि खूब सपोड़िक ।

सुरा राग मा डूबाणा छन ।।

सुख सुविधों रुमुक प्वड़िं ।

सब लोग इनि बताणा छन ।।

कळेजा रुंग्ड़ि स्वीणा बुखै ।

यो हमर ज्यू जलाणा छन ।।

बुनै जनसेवा का नौ फरि ।

बस चौंरमुट्ठा हलाणा छन ।।