народная песня
ТЕКСТ ПЕСНИ:
Уоредэ, Тӏраукъэ,
Уореди, Тӏрау!
Уореди, Тӏраукъэ,
Тӏраум сытхэр и лажьэ?
Уореди, Тӏраукъэ,
Тӏраум и лажьэр лажьэшхуэщ.
Пхъэр якъутэмэ - сыуэщкъэ,
Пхъэр ирахьэмэ - сышыдщ,
Унэр япхъэнкӏмэ - сыжыхапхъи,
Пхъэнкӏийр ирадзым - сыхьэнцэщ.
Уореди, Тӏраукъэ,
Тӏраум и лажьэр къэхъуаи.
ӏэнэр щахькӏи сыпашэщ,
Шыр щалъэщӏкӏи сыпхъэкущ,
Зырамыкужыр согъасэ,
Я гуащэнысэми сыкъоплъ.
Уореди, Тӏраукъэ,
Тӏраум сытыр и лажьэ?
Уоредэ, Тӏраукъэ,
Тӏраум и лажьэр къэхъуаи.
Алащэгъуитӏыр согъашхэ,
Алащэм я вейр дызош,
Аслъэмырзэ сыкъешэж,
Пӏэ ухуам сынегъэгъуэлъ,
Гуащэнащхъуэ къысхуогъуэлъыж.
Уореди, Тӏраукъэ,
Уореди, Тӏрау!
Гъатхэм плъыру сыхуожьэ,
Бжьыхьэм пэшыр согъэплъ,
Гуащэм дежкӏи соплъэкӏ,
Кӏыфӏ зэрыхъуу сохьэщӏэ.
Уореди, Тӏраукъэ,
Тӏраум сытыр и лажьэ?
Уоредэ, Тӏрау,
Тӏраум и лажьэр къэхъуаи.
Хьэщӏэ лъапӏи сыхуохъу,
Тхъэжу жэщыр согъакӏуэ,
Нэхущ дахэм сокӏуэж,
Аргуэрыжьти солӏыщӏэ.
Уореди, Тӏраукъэ,
Тӏраум сытыр и лажьэ?
Уоредэ, Тӏрау,
Тӏраум и лажьэр къэхъуаи.
Тӏрау къытхудэзышам
Алыхьым ишэр къытихуэ,
Тӏрау тхудэзышыжым
Къундет шы къарэр еттынт.
Уореди, Тӏраукъэ,
Тӏраум сытыр и лажьэ?
Уоредэ, Тӏрау,
Тӏраум и лажьэр вжесӏэнщ.
Хьэщӏэщ джабэр уоуцӏэпӏ, - жари
Екӏэпцӏэ цӏынэкӏи сыдаху.
Дэнэ сыфхуну, хьэ жылэ?
Дэнэ сыфхуну, кхъуэ жылэ?
Уореди, Тӏраукъэ,
Тӏраум сытыр и лажьэ?
Уоредэ, Тӏрау,
Тӏраум и лажьэр къэхъуаи.
Источник: книга З. Кардангушева "Адыгэ уэрэдыжьхэр"