ТЕКСТ ПЕСНИ:
Заремэ итхьамыкӏагъо гущэри
Мы гъыбзэм къызэлъеӏуат,
Бэлахьэу ащ къехъулӏагъэ гущэми
Шэуджэныхьаблэ хегъаплъ.
Чылэмэ ялыеу хъугъэ гущэба
Орыджэ сышыпхъу дах,
Хьадэгъур мыщ къыщыуажэ гущэти
Укъакӏуи тыхэунагъ.
Шэмбэтым ичэщы фабэ гущэми
Нысэищыжьыр рагъажь,
Уфэгуитӏоу узыдэкӏуагъэ джэгуми
Укъащи ухэмылажь.
Купэу мы джэгум къекӏугъэ гущэмэ
Ялыеу сыдым уишӏыгъ,
Къаомэ, шхончы мэшӏуащэ гущэми
Уеукӏи тыунэхъугъ.
А чэщым сыдэу удахэ гущэри
Заремэу сышыпхъу дах,
Уихьадэ цӏыфэу теплъагъэ гущэми
Къаӏожьышъ тыкъагъэдаӏу.
Тыжьыны ӏэлъынри пӏапэ фыжьыхэм
Дахэуи къарелыдыкӏ,
Шӏуцӏабзэу уиджэнэ лъапӏэ гущэри
Зэкӏужьэу боу ар зэикӏ.
А чэщыр уикӏодыпӏалъэ гущэуи
Сыд мыгъом уянэм фишӏэн,
Хьазабэу зыхэудзагъэ гущэри
Егъашӏэм щымыгъупшэн.
Ар ӏэтхъо-лъатхъоу бэу зэтхъожьыба
Ӏэзэгъуи къыпфемыгъот,
Сыдэуи тхьамыкӏэгъошхо гущэба
Щэӏагъэ Тхьам регъэгъот.
Утхъэ пшӏоигъоуи птыщы джэгузэ,
Лъфыгъэхэр дапщи укӏуагъ,
Уахэтэу зыбгъэлъэразэ пэтызэ
Зыгори къыщыкууагъ:
– Заремэ щэм ыпсэ хехы, – аӏозэ,
Чылэри къыочъэлӏагъ,
Къэплъфыгъэм ихьадэ чъыӏэ гущэри
Убгъэгуми къычӏэфагъ.
Заремэ ышыпхъу цӏыкӏу гущэри
Ышъэ икӏыным ӏукӏагъ.
Ащ ышъхьацышъо ритхъыжьы гущэзэ
Бэрэ Заремэ еджагъ.
Уянэуи сянэм къылъфыгъэ гущэми
Бэлахьыр къыфыуагъахь,
Уянэжъэуи уихъяр къежагъэ гущэри
Сыдэуи зэхэогъап.
Унагъо о уихьэгъагъэ гущэмэ
Тэрыджэ бэу насыпыгъ.
Зэхэтлъхьажьыгъэмэ зэ щыгъыныхэр тӏозэ,
Тэ тыбгъэшэхъугъ.
Джы гугъэузэу уишэты лъагэми
Зэкӏэми тыкӏэлъырыс.
Хьадрыхэ хабзэ щыӏахэ гущэмэ
Джэнэтыр къыуерэпэс.
А чэщ дэдэм ӏэзапӏэ гущэми
Елбэтэу укъынагъэс,
Ау сыд мыгъор ишӏуагъэ гущэти
Къытаӏуи зигъонэмыс.
А ебэуи гузэжъогъу чэщыми
Уянэшхэр уихьадэщэжь,
Ящагу ащ дэхъухьагъэ гущэри
Яузышъ агу дэмыфэжь.
Нэфылъэм ищэ хэхыгъо гущэми
Уихьадэ къынагъэсыжь,
Уи Мыекъуапэу уадэжьы гущэри
Гъашӏэми умылъэгъужь.
Апсэ хэӏэжьызэ уятэшыпхъухэм
Якӏыи макъи зэлъэӏу.
Шыхэм япцӏымэмэ макӏэ гущэми
Къиныкӏэ цӏыфхэр ядэӏу.
Уибэнтехъо шхъонтӏабзэ гущэба
Данэуи шъо техьэ-текӏ,
Уидэкӏыжьыкӏэ гухэкӏы гущэба
Сыдэуи тызэонэкӏ.
Заремэу сышыпхъу дахэ гущэба
Егъашӏи тыгум уилъын.
Тимурэу зигъонэмысы гущэри
Гушӏоуи къыппэгъокӏын.