народная песня
Категории: кабардинские песни
ТЕКСТ ПЕСНИ:
Лохэ срапхъут,
Ежьу: Уо-ра, уо-уо-рирэ, уо!
Лӏы сратри!
Ежьу: Уо-ра, уо-уо-рира, уо!
Сызратри уи шабий вакъэт.
Срамыпхъуу срапхъурылъхутэмэ,
Лӏы сратыххэнтэкъым.
Вы къарэжь фиӏэти - лъакъуищт.
Зэшыжьищ фохъури - фи зырызщ.
Мэш хьэсищ фиӏэщи - мацӏэ хъуахуэщ.
Зэшыжьищ фохъури - фи зырызщ.
Псыжь Локъуажэр - Локъуажэжьт.
Вакъэ зэпэӏудэт, упщӏэ лъеижьыр дамыгъэт.
Унэмкӏэ сокӏуэри, гуащэжьым сыщӏигъэхьэркъым.
Жьантӏэмкӏэ сокӏуэри, пщыжьым идэххэркъым.
Пэшымкӏэ сокӏуэри, пщыпхъум сыщӏигъэхьэркъым.
Дэнэ мыгъуэм сыкӏуэжыххэну - сотхьэусыхэ!
Хьэщӏэщыжь фиӏэти, уи хьэгъэщтт.
Псыжь и псыхъуэр нэпскӏэ согъажэ.
Алътогъуз и джабэхэм сыкӏэрохьэ.
Алътогъуз и пхъэ дакъэхэри си пӏэщхьагът.
Алътогъуз и пщӏащэхэри си уэншэкут.
Ар си щхьэцыгъуэшхуэри дзажэ щӏэдзт.
Ар си ӏэблэшхуитӏри пщэрыдзэнт!
Пасэм абазэпщ Лохэ куэд зылъэкӏыу Абазэ хэкум исащ. Лохэ къулейуэ, ӏэщ я куэду, езым я шы лъэпкъ «ло» и цӏэу къагъэхъуауэ, адыгэ хэку псоми щыцӏэрыӏуэу щытащ. Тамбий Дыгулыбгъу кӏахэм кӏуэуэ Бэлэтокъуэхэ я шыбзыр къыщихуам зытесар Лохэ я шы лъэпкъщ. Абы тесу жэщым Бахъсэн къиуауэ къыхыхьэри, итхьэлауэ щытащ ишри езыри.
Лоужь гущэм и саур бгъуитӏым,
Лъы бахъэр къызэрохьэх;
Псыхьэлыгъуэм хуэдэу кърихьэхыжри,
Тамбий и къуэкӏэ пщы Дыгулыбгъущ.
Ло гущэу уи Лоутхъуэжьыр
Къэрэтобэ къыщогъэщыщ,
Дыщэм хуэдэурэ уи дыщэ быныр
Бахъсэн псыхъуэ къыщогъэщыгъуэ, - жеӏэ
Дыгулыбгъу и уэрэдым.
Урыс пащтыхь Александр Етӏуанэм и зэдзэкӏакӏуэу, и адъютанту щытащ полковник Ло Мэмэт-Джэрий, Бытырбыху кадет корпус къыщиухауэ. Лохэ я ӏэмыщӏэ илъащ Хы Фӏыцӏэм и ӏуфэм ӏут мафӏэгу увыпӏэ цӏыкӏур. Езы Лохэ Псыжь и ӏуфэм ӏусащ.
Атӏэ, апхуэдизу зылъэкӏ абазэпщ Лохэ япхъу Минэт дахэр лъхукъуэлӏ унагъуэ гуэрым егъэзыгъэкӏэ иратати, мы тхьэусыхафэ уэрэдыр иусащ. Уэрэдыр абазэхэм абазэбзэкӏэ, адыгэхэм адыгэбзэкӏэ жаӏэу, я уэрэд гъэфӏэну щытащ.
Уэрэдыр дызыгъэтхар Кӏэм Ӏэюбщ, Hэнджэщауэ Исмел къыдежьууэ (1968 гъэ).
Источник: Bjami Radio
ключевые слова: 1эблэшхуит1ри