Къундет и къуитӏым хуауса уэрэд

ТЕКСТ ПЕСНИ:

Уэрэдыр фадэм къыхокӏыр,

Зэхэкӏыр губжьым къыхах, зи унагъуэрэ!

Шы дахэ мыжэри фэтехщ,

Уэр, дохъутей техыныр лӏыгъэжьщ.

Тӏуащӏэжьым дэ дыщыдэсым

Тэхъуанэр дэ ди хьэщӏэщт.

Къундет и къуитӏыр фошэсыр,

Уэр, Къундет и къуитӏыр фошэс.

Ермэлы бзагуэри фи гъуазэт,

Сасыкъ Исмелыжьри фи гъусэт.

Ищхъэрэ Къумыми фынохыр,

Уэр, нэгъуей уэтоми фытохьэ.

Нэгъуей хъаныжьри къыщӏокӏыр,

Уэр, фӏэхъус-сэламри къывех.

И хьэщӏэщ лъапӏэм фыщӏешэ,

Хьэщӏэ нышыр пшэрурэ фхуеукӏ.

- Къундет и къуитӏыурэ си хьэщӏэ,

Сыт щхьэкӏэ фыкъысхуэкӏуа?

Ахъшэ щхьэкӏэ фыкъысхуэкӏуамэ,

Фи тумэн пщӏырыпщӏи фэстынщ.

Тумэн пщӏырыпщӏри фыфӏэмащӏэм,

Фи тумэн тӏощӏ-тӏощӏри фэстынщ.

Былым щхьэкӏэ фыкъысхуэкӏуамэ,

Уэр, нэгъуей джэмыдэхэр бжьэпэплъщ.

Нэгъуей бжьэпэплъхэр пщӏырыпщӏщ,

Уэр, фи пщӏырыпщӏыхэ фэстынщ.

Фи пщӏырыпщӏыхэр фыфӏэмащӏэмэ,

Уэр, фи тӏощӏ-тӏощӏыхи фэстынщ.

- Былым щхьэкӏи дыкъыпхуэкӏуакъым,

Уи пхъуантэ фӏыцӏэжьри къыдэт.

- Пхъуантэ фӏыцӏэжьри сиӏэжкъым,

Ар фызыхуей дыдэри къызэфщӏэ.

Мыхьэмэт ӏэшэри мэпсалъэри:

- Ар былым хьэлэлри нэхъыфӏщ, - жеӏэ.

Сасыкъ Исмелыжьри мэгубжьри:

- Къундетхэ фэ фи лъэпкъ хабзэщ, - жеӏэ, -

Жыжьэу фыщытмэ фыдалъэу,

Ар фекӏуэтэлӏэӏуэмэ фыубзэу.

Мыхьэмэт ӏэшэри мэгубжьри,

Уэр, нэгъуей хъаныжьри ныщӏеш.

Уэто щӏыбагъымкӏэ ирешэкӏри,

Уэр, мэл жьагъэ хабзэу ныфӏебз.

Мэхьэмэт ӏэшэри къокӏуэжри,

Уэр, пхъуантэ фӏыцӏэжьри якъутэ.

Къутыныр тайуэрэ къыдахыр,

Дыжьыныр хуауэрэ къыдадз.

Ахъшэри пхырурэ зыдащтэ,

Уэр, нэгъуей напэхури я кӏэст.

Шихым я хьэлъэри ирагъэкъур,

Къэлътмакъхэр къуауэрэ къожьэжыр.

Бжьыхьэпэ уэсри къатосэ,

Уэр, жэщыбг мазагъуэти зебзыж.

Мы уае бзаджэри къатохъуэ,

Уэр, Къурей щэджыжьхэми нокӏуалӏэ.

Къурей щэджыжьхэри ягъэсыр,

Уэр, дыщэ сырымэри ягъэу.

- Пщэдджыжь кӏэхур къыщищӏым,

Уэр, дыщэ нэрыплъэри фогъаплъэ.

Воронцовыжьыми фыдоплъэ,

Воронцовыжьыр мэзэрызохьэ.

"Хьэжэбэжащэри къыдокӏыр,

Ди ужьым пхъэрыр къикӏынущ!"

Шэшэн шы гъуабжэри кӏэлъэфт,

Уэр, пхъэ лъэф лъэужьти ножьэжхэр.

- Сэлмэн икӏыгъуэмкӏэ дывгъакӏуэ!

- Сэлмэныжьыр икӏыгъуэ закъуэщ.

Бэтэгъэжь закъуэри къыӏуткъэ,

Къущхьэ фочауэр ӏутыхэщ!

- Матэкъалэжьымкӏэ дывгъакӏуэ!

- Матэкъалэжьыр фочауэщ!

- Зимыажалыр ихьынкъым,

Псы закъуэри зэпыдоупщӏ!

Шу пхъэрыжь куэдри къыщысым,

Уэр, нэгъуей нэкӏухури хыфӏадзэ.

Шэджэмыжь банэми фыхохьэ,

Шэджэмыжь банэми фыхамыгъэс.

Шэджэм чэщанэми фафӏохьэ,

Ари хэщӏапӏэ фхуэмыхъут.

Лъэужьыр пыбзкӏэрэ зэрахуэ,

Ар Шэджэм чэщанэми нахус.

Пщэдджыжь зауэри яублэ,

Къэрабгъэм инэр жьуджалэт.

Шэджэм чэщанэми кърахури

Аруан псыхъуэ фыдахуэ.

Аруан псыхъуэми фыдахури

Аргуданым фыныдохьэж.

Аргъэщокъуэм икъуэкӏэ Бэчмырзэ,

Аргуданми фыкъыдимынэ.

Чыгъэдухэ хьэщӏэщым фокӏуалӏэ,

Тхылъымпӏэ ахъшэри фогъэс.

Гуэбэщӏыкӏхэ фи Екъубыжьым

Фыз ӏэлъэщӏыр нызытрелъхьэ.

Фыз бостейри нызыщетӏагъэ,

Фыз щӏыкӏэу зырегъэхьыж.

Чыгъэдухэ хьэщӏэщым фыщӏахури

Лэскэн псыхъуэ фафӏыдохьэж.

Къундет и къуитӏми драгъэзей,

Щауащхъуэ икъуэм ирегъэзых.

Пхъэгулъейри зи зэпэбаш,

Къэзакъышэм хуэмыгъэтӏыс.

Ар езыри "хэтхэ ящыщ" жыпӏэм,

Къундетым икъуэкӏэ Мыхьэмэт ӏэшэщ.

Зи хьэдэр Шордакъымэ нрахьэ,

Зипсэ тӏэкӏур хьэршым хыхьэж.

Ар езыри хэтхэ ящыщ жыпӏэмэ,

Адыгэунэ икъуэкӏэ фи Ахьмэдщ.

Ключевые слова: къуит1ым