Бэдынокъуэ нарт хасэм къокӏуэ

ТЕКСТ ПЕСНИ:

1.

Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

Ежьу: Уэрирэ, уэрирэ, уарира!

2. Нартхэ ди лӏы икъугъэ...

Ежьу: Уэрирэ, уэрирэ, уарира!

3. Чынтыр зи ныкъуэкъуэгъуи...

4. Хьэрхуэрэгъу и бащэ...

5. И зы пкъыгъуэри пкъыгъуищэ!

6. Уэ-уи, уэ-уи, уэ-уи, уэ-уи,

И зекӏуэнри къыщохьэ.

7. Ишми уанэ трелъхьэ...

8. Шы ныбэпхри щӏекъузэ...

9. Зэщӏекъузэри ношэскъэ.

10. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

11. Нартхэ ди лӏы икъугъэ...

12. Лӏыхъур ныдошэсыкӏри.

13. Шы пэбзийм кърихумэ...

14. Гъуэгу напщӏэр елыгъуэ.

15. Хьэ самыр кӏагуитӏри...

16. И бгъуитӏым щоджэгумэ.

17. И бгъэ гъэсагъитӏри...

18. И щхьэм щофэразэмэ.

19. Уэ-уи, уэ-уи, уэ-уи, уэ-уи,

Нартхэ ди Бэдынокъуэ!

20. И дамэ лъэныкъуэми...

21. Дыгъэшхуэр къыщопсымэ.

22. И дамэ лъэныкъуэми...

23. Уэсышхуэр къыщосмэ.

24. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

25. Псыжькӏэ кърогъуазэри...

26. Гъуазэкӏэ кърыдокӏри.

27. Псыжьуэ икӏыгъуэншэри...

28. Шы джабэпс хуэмыхъуурэ.

29. Лӏыхъур зэпрокӏмэ.

30. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

31. Нарт ӏэхъупӏэми нытохьэ.

32. Нартхэ ӏэхъуэми ныӏуощӏэ.

33. - Бэхъу апщий! - жреӏэ.-

34. Нарт хъыбари сыгъащӏэ.

Нартхэ я ӏэхъуэр Бэдынокъуэм зэрыӏуплъэу къецӏыху. Ӏэхъуэр Бэдынокъуэ къыщогуфӏыкӏ, къыщотхъу, абы щыгъуэми къыжреӏэ, нартыжьхэр Сэтэней деж ефэ-ешхэу зэрыщӏэсхэр, Нэсрэн Жьакӏэ тхьэмадэу, Сосрыкъуи яхэсу, нартыжьхэм джатэ кӏэщӏхэр я бгырыдзэну зэрыщызауэр. «Абыхэм пщащэ дахэ я къэфакӏуэщ, уэ джэгуэгъу пхуащӏынщи лей къуахынщ, си щӏалэ, умыкӏуэ!» - къыжреӏэ.

35. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

36. Нартхэ ди лӏы икъугъэ...

37. Зи щхьэр дымылъагъуурэ...

38. Зи гугъум дигъалӏэ...

39. Бэлэрыгъ зекӏуэкӏэ!

40. Уи шыфэлӏыфэри сфӏэдахэщ...

41. Уи къэкӏухьыкӏэри си жагъуэщ!

42. Уэ-уи, уэ-уи, уэ-уи, уэ-уи,

Нартхэ ди Бэдынокъуэ!

43. «Фыз хъыбарщ» жумыӏэмэ...

44. Зы хъыбари бжесӏэнкъэ.

45. Алыджхэ я лъагъуэри...

46. Ар гъуэгу нэшэкъашэщ.

47. Алыджхэ я унэжьри...

48. Унэ хужь лъэбышэщи,

49. Абы зы гуащэ исщи,

50. Ар бажэ зекӏуэкӏэщи,

51. Унэ жыхафэгури...

52. Ар и тхьэмахуэкӏуэщи!

53. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

54. Нартхэ ди лӏы икъугъэ!

55. Сэтэнейми и ефэщ.

56. Санэхубжьэри я кӏадэщ.

57. Вы ехъуари я нышкъэ.

58. Гъэлъэхъу пшэрри я шыпскъэ...

59. Нартыжьхэри зэхэскъэ.

60. Нэсрэн Жьакӏэри къыщыскъэ.

61. Сосрыкъуэри щӏэсыххэщ.

62. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

63. Пщащэ дахи я къэфакӏуэщ.

64. Абы ущеблагъэмэ...

65. Уэ джэгуэгъуи пхуащӏынкъэ.

66. Нартыжьхэри щызоуэр.

67. Джатэ кӏэщӏхэри я бгырыдзэнкъэ.

68. Лей къуахынщ, си щӏалэ! -

69. Ӏэхъуэ цӏыкӏумэ щыжиӏэм...

70. Бэдынокъуэри мэгубжькъэ...

71. Дакъэжь мафӏэу зэщӏонэр.

Бэдынокъуэ абы къегъэгубжь, дакъэжь мафӏэу зэщӏонэри ӏэхъуэжьым тохъущӏэ. И хуарэ псыгъуэм йолъэдэкъауэри зэ пкӏэм, зэ лъэуэ, зэ лъэм, умылъагъужу нарт къуажэмкӏэ еунэтӏ.

72. - Уэ-уи, уэ-уи, уэ-уи, уэ-уи,

Нартхэ ди ӏэхъуэ жьэхъу...

73. Нартхэ ди жэмыхъуэжь!

74. Зы псыпцӏэ сыӏущӏэмэ...

75. Си хуарэр хэнэныуэ.

76. Зы щауэ сыӏущӏэмэ...

77. Сыкъыхигъэщӏэнуэ

78. Щхьэ уэ къызжепӏэххэ!?

79. Сы ефакӏуэ-ешхакӏуэкъым...

80. Сылэгъунакӏуэ щауэкъым.

81. Нарт щауэгъу солъыхъуэри.

82. Ем срилъыхъуакӏуэщи...

83. Фӏым сриӏэщакӏуэщ!

84. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

85. Нартхэ ди лӏы икъугьэ...

86. Нартхэ жылэмкӏэ егъазэ.

87. Ар и хуарэ псыгъуэри...

88. Зэ пкӏэмэ, зэ малъэ.

89. Зэ лъамэ, плъагъужкъым.

90. Сэтэней и къуажэмкӏэ...

91. Лӏыхъум еунэтӏымэ...

Сэтэней и унэӏутыр псыхьэ кӏуэну ежьауэ шу къакӏуэр елъагъу. Ар хэтми унэӏутым къыхуэмыцӏыхуу, щӏолъэдэжри Сэтэней жреӏэ.

92. Уэ-уи, уэ-уи, уэ-уи, уэ-уи,

Сэтэней и унэӏутыр...

93. Ар мывэху унэжьу...

94. Ар жыгеижь лъэгуу...

95. Ар нартыжь джэгупӏэм...

96. Къыщӏэкӏауэ къелъагъур...

97. Псыхьэ кӏуэнуи ежьауэ...

98. Бедакъитӏи иӏыгъыу...

99. Бэдынокъуэри щилъагъукӏэ...

100. Бедакъитӏри хыфӏедзэ...

101. Сэтэнейми хуокӏуэжкъэ.

102. - Уэ-уи, уэ-уи, уэ-уи, уэ-уи,

Уэ ди анэуэ Сэтэней...

103. Уэ Сэтэней гуащэ...

104. Гуащэми я мыфэгъу...

105. Цӏыхуми я фэ гъуэджэ...

106. Джэшри зи гушыӏэгъу...

107. Тэджми я Мэзытхьэ!

108. Мыбыкӏэ зы шу къокӏуэри...

109. А шум хуэдэ шу...

110. Ди хэку щыземыкӏуэ...

111. Сэ слъэгъуами яхэмыт...

112. Уэ плъэгъуами ящымыщ!

Сэтэней хощтыкӏри етӏуанэуи и унэӏутыр къыщӏегъэж, и шыфэлӏыфэм кӏэлъыплъу жриӏэну. Унэӏутыр Бэдынокъуэ и шыфэлӏыфэм кӏэлъоплъри, щӏолъэдэжри дилъэгъуар Сэтэней жреӏэ.

113. Уэ-уи, уэ-уи, уэ-уи, уэ-уи,

Сэтэнейри хощтыкӏыр:

114. - А, хьэбзурэ куэпэч...

115. Уэ плъэгъуами хэмыту...

116. Сэ слъэгъуами щымыщу...

117. Ари дэнэ къиукӏт нобэ!

118. Шыфэлӏыфэм кӏэлъыплъ щӏэхгуэ!

119. Унэӏутыр къыщӏэжри...

120. Шыфэлӏыфэм кӏэлъыплъри...

121. Дилъэгъуари жриӏэщ.

122. - Уэ-уи, уэ-уи, уэ-уи, уэ-уи,

Е Сэтэней-гуащэ...

123. Гуащэхэм ялей!

124. Абы и шыфэлӏыфэр арщ:

125. Япэкӏэ пшагъуэ гуэрэнщ...

126. И ужьым къуанщӏэ бзур щолъатэ.

127. Шы гущӏыӏум шэтыр щеухуэ.

128. Маскӏэ гуэрэ къыӏурихым...

129. Гъуэгу напщӏитӏыр елыгъуэ.

130. И бгъуитӏым хьэ самыр щоджэгу.

131. И бгъэ гъэсагъитӏыр...

132. И щхьэм щофэразэ.

133. Маскӏэр зэуэ-зэуэу...

134. Лӏыхъум къыӏурехыр.

135. Дыгъэр и щхьэщыгущ.

136. Шыщхьэри уэгум етащ!

Унэӏутым шур щыхуэмыцӏыхум, езы Сэтэней къотэдж, куэбжэ цӏыкӏумкӏэ щэхуу къыдоплъри къоплъакӏуэ, зэрилъагъууи къецӏыху. Сэтэней удти мурад ещӏ Бэдынокъуэ къригъэблагъэу и лӏыхъупкъ хихыу къаруншэ ищӏыну, Сосрыкъуэрэ нартхэмрэ къатемыкӏуэн щхьэкӏэ. Бэдынокъуэ къригъэблэгъэну унэӏутыр къыдегъэкӏ.

137. Уэ-уи, уэ-уи, уэ-уи, уэ-уи,

Унэӏутым щимыцӏыхум...

138. Сэтэнейри къотэджыр...

139. И пхъэ вакъэм къоувэр,

140. Бажэ хуэдэ къызекӏуэу...

141. Куэбжэ цӏыкӏум къыхуокӏуэ...

142. Куэбжэ цӏыкӏум къыдоплъри...

143. Зэрилъагъууи къецӏыхур.

144. - Уэ-уи, уэ-уи, уэ-уи, уэ-уи,

Е хьэбзурэ куэпэч...

145. Уэри умылъэгъуауэ...

146. Сэ слъэгъуами ящымыщуэ...

147. Апхуэдэ дэнэ къикӏыжын! -

148. Уэ плъэгъуами ящыщщ ар...

149. Сэ слъэгъуами ящыщщ ар!

150. Япэкӏэ пшагъуэуэ щыплъагъур...

151. И шы пэщхъын гъуэзщ.

152. И ужьымкӏэ къуалэбзу щылъатэр...

153. Шы лъэгу вабдзэ ятӏэщ.

154. Шы гущӏыӏум шэтыру щыухуар...

155. Сагъындакъ зэпылъщ!

156. Маскӏэгуэрэ къыӏурихыу плъагъур...

157. И шы жьэ тхъурымбэщ...

158. Ар езыр нартхэ Бэдынокъуэщ!

159. Чынтыр и ныкъуэкъуэгъущ...

160. Чынт зауэми къокӏыж.

161. Укӏэлъыплъым фэрыщӏщ.

162. Цӏыху щӏыкӏейхэми ящыщщ.

163. Ар Тэнкӏэ щыгъуазэщ,

164. Псыжькӏэ щыгъуэзэкӏейщ.

165. Езыр щхьэкӏуэ мышэчщ.

166. Ар щхьэщыщхъугуэ дэкӏыжмэ...

167. Хъукӏэвыкӏэр ӏуигъэкӏынщ...

168. Кӏэн джэгу щӏалэхэр тфӏищыпынщ...

169. Сосрыкъуэ и лъэгуажьэхуитӏыр...

170. Бжыпэкӏэ зэриӏулӏынщ.

171. Ӏэмал имыӏэу къыдэтхьэхынщи...

172. И лӏыхъупкъи хэтхынщ абы.

173. Къегъэблагъэ щӏэхыуэ! -

174. Жиӏэри унэӏутыр къыдихуащ.

Унэӏутыр къыдожри Бэдынокъуэм ирегъэгъазэ. Бэдынокъуэ абы фӏэхъус ирех. Унэӏутыр Бэдынокъуэм къолъэӏу Алыджхэ я унэм еблэгъэну, фӏыгъуэ-тхъэгъуэхэр къыхуегъэлъагъуэ, ауэ Бэдынокъуэ «сыефакӏуэ-ешхакӏуэкъым», - жеӏэри еблэгъэн идэркъым.

175. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

176. Нартхэ ди лӏы икъугъэ...

177. Нартхэ бжыщхьэ дыкъуакъуэ...

178. Зи шыжь емыкъужыххэ...

179. Мыдэ зэ къэгъазэт.

180. Нарт лӏыхъуми къыщигъазэм...

181. И фӏэхъусри кърехыр.

182. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ!..

183 Нартхэ ди лӏы икъугъэ!

184. Мыр Алыджхэ я унэщ.

185. Санэхубжьи я кӏадэщ.

186. Вы ехъуари я нышщ,

187. Гъэлъэхъу пшэрри укӏащ.

188. Хъыджэбз дахи я бащэщ.

189. Къан хъыджэбзуэ дахащэр...

190. Уэ джэгуэгъуи пхуэтщӏынкъэ...

191. (Уэ) къеблагъэ, щауэфӏ!

192. - Уэ-уи, уэ-уи, уэ-уи, уэ-уи,

Мыр Алыджхэ я унэми...

193. Фӏыкӏэ тхьэми игъэунэ!

194. Санэхууэ фи кӏадэми...

195. Нартыжьхэри евгъафэ!

196. Вы ехъуауэ фи нышыр...

197. Фӏыкӏэ тхьэм фигъэшх!

198. Гъэлъэхъу пшэру укӏари...

199. Фӏыкӏэ тхьэм фигъэшх!

200. Къан хъыджэбзу дахащэм...

201. Нартыр дэвгъэджэгу!

202. Сыешхакӏуэ-ефакӏуэкъым...

203. Сылэгъунакӏуэ щауэкъым...

204. Сыябгэ щӏыхьэхущ...

205. Сыхьэхуншэ шущ...

206. Нарт щауэгъу солъыхъуэ!

207. - Нарт щауэгъу ухуейм...

208. Къанж и къуэжьыр пхуэдгъуэтынщ!

209. - Къанж и къуэжьым сыхуейкъым.

210. Нэрыбгейм и къуэ закъуэщ...

211. Щӏалэ закъуэри ӏузгъэкӏынкъым!

212. - Сосрыкъуэри пхуэдгъуэтынщ!

213. - Сосрыкъуэми сыхуейкъым.

214. Езыр хъуагъэщагъэ бэщӏщ...

215. И бзаджагъэри йобэкӏ! -

216. Бэдынокъуэми щыжиӏэм...

217. Сэтэнейри къыкъуокӏыр.

Бэдынокъуэ унэӏутым къыщыхуемыблагъэм, Сэтэней къыкъуокӏри еблэгъэну, зы бжьэ къыхуефэну къолъэӏу. Щыхуемыблагъэкӏэ, и ӏэлъэщӏыр зэтрехри и жьэгъухум ӏуегъаплъэ. Абы щыхуемыплъым, и бгъэгухум ӏуегъаплъэ. Ари щыфӏэмыӏуэхум, и бынджэм ӏуегъаплъэ, ари хъымпӏар щимыщӏым, шылэ уагъэр зэпечри и щахэгум ӏуегъаплъэ.

218. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

219. Нартхэ ди лӏы икъугъэ...

220. Чынтри зи ныкъуэкъуэгъу.

221. Сосрыкъуэ имысми...

222. Шы шэс нарт сыпащӏ!

223. Сэ фызми саумыгъэщхь...

224. Уи щхьэ йомыусыгъуэджэу...

225. Къеблагъи зы бжьэ къысхуефэ!

226. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

227. Нартхэ ди лӏы икъугъэ…

228. Щыхуемыблэгъэххэм…

229. Сэтэнейри мэгубжьри…

230. И щхьэ лъащӏэр фӏегъэху…

231. И жьэгъухуми ӏуегъаплъэ!

232. Бэдынокъуэри хуемыплъкъэ.

233.Кърегъэкӏуэтэхри…

234. И бгъэхум ӏуегъаплъэ!

235. Бэдынокъуэми фӏэӏуэхукъым.

236. Кърегъэкӏуэтэхри…

237. И бынджэгум ӏуегъаплъэ!

238. Бэдынокъуэми фӏэӏуэхукъым.

239. Сэтэнейри мэгубжьри…

240. Шылэ уагъэр зэпеч…

241. Ирегъэхуэхри…

242. И щахэгум ӏуегъаплъэ!

Бэдынокъуэ абы къегъэгубжьри, Сэтэней «зэрыхьэбз удыр» къыжреӏэ. «Уэ пхуэдэ хьэбз уд нэмыщӏ, дэ ди хэку имысмэ, ди хэкум Тхьэр ибгэ!» – жери Сэтэнейр зрипэсыркъым. «Абы къыфӏэбгъэкӏмэ, уэ пхуэфащэ бгъуэтынщ, сэ нарт щауэгъу солъыхъуэ! – жреӏэ Сэтэнейм Бэдынокъуэ.

243. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

244. Нартхэ ди лӏы икъугъэ…

245. Бэдынокъуэр мэгубжь.

246. –Нихьэ-къихьэм хуалъхуа…

247. Куэншыбыжьыщхьэм траха…

248. А сызыӏубгъаплъэр...

249. Ар нартыжь джэгупӏэщ!

250. Уэ хуэдэ хьэбз уд нэмыщӏ...

251. Дэ ди хэку имысмэ...

252. Дэ ди хэкум Тхьэр ибги!

253. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

254. Нартхэ ди лӏы икъугъэ.

255. Уэ укъемыблагъэми...

256. Си шхын зышхыни згъуэтынщ...

257. Сэ си фади къинэжынкъым!

258. - Ей, Сэтэнейуэ фыз уд...

259. Щхъухьпсыхь зэхэщӏэ...

260. Нартым зы къащӏэзмыгъэныж!

261. А сызыӏубгъаплъэр...

262. Нартым я джэгупӏэщ!

263. Уэ пхуэдэ куэпэчым...

264. Сэ сыдихьэхатэмэ...

265. Нобэм сыкъэсынтэкъым сэ!

266. Абы къыфӏэбгъэкӏмэ...

267. Уэ пхуэфащэ бгъуэтынщ!

268. Нарт щауэгъу солъыхъуэри,

269. Нарт хъыбар къызжыӏэ!

Сэтэней абы къегъэгубжьри, нартыжьхэр щефэу зыщӏэс унэм Бэдынокъуэр еутӏыпщ. «Нарт щауэгъу бгъуэтынщ, гъуэгупэ узри къыуатынщ!» - жеӏэри.

270. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

271. Нартхэ ди лӏы икъугъэ!

272. Нарт хъыбар ухуеймэ...

273. Нарт хъыбар бжетӏэнщ.

274. Къуажэкӏэмкӏэ уехымэ...

275. Нартмэ я санэхуафэщ.

276. Ар зыщефэ унэр...

277. Унэ хужь бгъунджщ...

278. Унэ бгъундж пхашэщ.

279. Нэсрэн Жьакӏи тхьэмадэу...

280. Сосрыкъуи я пщафӏэу...

281. Санэхуафэр абы щащӏыр.

282. Абы ущеблагъэмэ...

283. Нарт щауэгъу бгьуэтынщ.

284. Гъуэгупэ узри къыуатынщ!

Бэдынокъуэ санэхуафэр здэщыӏэмкӏэ еунэтӏ. Ар зэрыкӏуэр куэбжэм ӏут нартым елъагъури санэхуафэм щӏэсхэм яжреӏэ. Къызэрыщӏохри, шу къакӏуэм къоплъ. Къахуэмыцӏыхуу Сосрыкъуэм къоупщӏхэр. Сосрыкъуэ имыщӏэн щыӏэ? Къецӏыхури, Бэдынокъуэ зищӏысыр нартыжьхэм яжреӏэ. Бэдынокъуэ яукӏа зэрыхъунумкӏи нартыжьхэр егъэӏущ.

285. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

286. Нартхэ ди лӏы икъугъэ...

287. Санэхуафэмкӏи егъазэ.

288. Куэбжэӏутым къелъагъури...

289. Санэхуафэм щӏолъадэри...

290. Бэдынокъуэм и хъыбарыр...

291. Санэхуафэм щеӏуатэ.

292. Санэхуафэр къыщӏожри...

293. Бэдынокъуэми къоплъакӏуэ.

294. Уэ нартыжьхэми ямыщӏэу...

295. Сосрыкъуэми къоупщӏхэр.

296. - Уэ-уи, уэ-уи, уэ-уи, уэ-уи,

Уэ нартыжьу делэжьхэ...

297. Тхьэр нартхэ къыфхыбгэ...

298. Бгыр нартхэ къыфтиуэ!

299. А шур сытуэ фымыцӏыхурэ?!

300. Ар нартхэ Бэдынокъуэщ...

301. Чынтыр и ныкъуэкъуэгьущ.

302. Чынт зауэми къокӏыж.

303. Тэнкӏэ ар щыгъуазэщ...

304. Псыжькӏэ щыгъуэзэкӏейщ...

305. Езыр щхьэкӏуэ мышэчщ.

306. Ар щхьэщыщхъууэ дэкӏыжмэ...

307. Хъукӏэ-выкӏэр ӏуигъэкӏынщ...

308. Кӏэн джэгу щӏалэхэр тфӏищыпынщ,

309. Нартым зы къыфщӏигъэнынкъым!

310. - Дауэ тщӏын-тӏэ, Сосрыкъуэ? -

311. Жаӏэу чэнджэщ щрахьэлӏэм...

312. Сосрыкъуэми къыжеӏэ:

313. - Ар ди анэм къыщыфӏэкӏакӏэ...

314. Зы ӏэмали етщӏэнщ...

315. Санэхубжьи къыхуивгъахъуэ...

316. Блащхъуэжьеищи хэвутӏыпщхьэ.

317. Санэхубжьэр щрифкӏэ...

318. Блащхъуэжьейми яукӏынщ ар!

319. Бэдынокъуэри арыххэу...

320. Санэхуафэми къэсащ.

Бэдынокъуэм нартыжьхэр къыпожьэ, щӏакӏуиблыр къызэпаубгъури, нартыжьиблыр и блыгу щӏэту, санэхуафэм ныщӏашэ. Блащхъуэжьейр есу хэсу санэхубжьэр къыӏэщӏагъэувэ, «санэхубжьэм къытхуефи, уи шыфэ-лӏыфэр къэтщӏэнщ!» – къыжраӏэ.

321. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

322. Нартхэ ди лӏы икъугъэ...

323. Зи щхьэр дымылъагъуурэ...

324. Зи гугъум дигъалӏэ...

325. Мыдэ къытхуеблагъэ! -

326. Жаӏэри нартыжьхэр...

327. Бэдынокъуэми къыпожьэ.

328. Нартыжьхэми щӏакӏуиблыр...

329. Нартхэ лӏыхъуми къыхуаубгъур.

330. Нартыжьиблыр и блыгу щӏэту...

331. Санэхуафэми ныхашэр.

332. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

333. Нартхэ ди лӏы икъугъэ!

334. Санэхубжьэм къытхуефи...

335. Уи шыфэлӏыфэри къэтщӏэнкъэ!

336. Санэхубжьэри къраткъэ...

337. Блащхъуэжьейхэр есу хэскъэ.

338. Блащхъуэжьейхэми гу нылъетэ.

Бэдынокъуэ блащхъуэжьейм гу нылъетэ, и жыр пащӏэр блащхъуэжьейм и накъыщӏэм ныхеукӏэри, фалъэм и щӏэм иреӏулӏри, фадэу щӏэтыр щӏефыкӏри фалъэр яретыж. «Сэ фысщӏэнщ!» – жиӏэу къыщигъазэкӏэ, нартыжьхэр мэгумэщӏ. Ирагъэгъазэри ӏэнэм ягъэтӏыс. Нартхэр зэрогъафэри къэфэн щӏадзэ.

339. Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

340. Нартхэ ди лӏы икъугъэ...

341. Бэдынокъуэри мэгубжьри...

342. И жыр пащӏэм зресэри...

343. Блащхъуэжьейми и накъыщӏэм...

344. И жыр пащӏэри хеукӏэ.

345. Блащхъуэжьейри хэкӏиикӏыу...

346. Фалъэм и щӏэм иреӏулӏри…

347. Санэу щӏэтыр щӏефыкӏри…

348. Нартхэ фалъэр яретыжкъэ.

349. –Сэ фысщӏэнщ! – жиӏэу къыщигъазэкӏэ,

350. Сосрыкъуэри гулэзщ,

351. Нартыжьхэри гузавэщ.

352. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ...

353. Нартхэ ди лӏы икъугъэ.

354. Доныкъуэкъуни тлъэкӏынкъым.

355. Мыдэ зэ къэгъазэ! -

356. Нартыжьхэри щылъаӏуэм...

357. Бэдынокъуэми игъазэри...

358. Санэхубжьи зэдефэри...

359. Къэфэн нартыжьхэм яублэщ.

Икъукӏэ гъэщӏэгъуэнщ, ӏэзагъышхуэ хэлъуи гъэпсащ Сосрыкъуэрэ Бэдынокъуэрэ къэфэнкӏэ зэрызэныкъуэкъур. Зауэнкӏэ мыхъуу, къэфэнми лӏыгъэ халъагъуэу, гъэсэныгъэ халъагъуэу зэрыщытар абы къегъэлъагъуэ. Мы пшыналъэм Сосрыкъуэ и хъуагъэщагъэм Бэдынокъуэ и лӏыгъэр трегъакӏуэри, нартхэ гъуазэу Бэдынокъуэ къахуонэ.

360. Уэ-уи, уэ-уи, уэ-уи, уэ-уи,

Сосрыкъуэри щылъэтри...

361. Нартхэ ӏэнэми дэлъейщ...

362. Ӏэнэри имыгъэсысу...

363. Шыпсри иримыкӏуту...

364. Ӏэнэ дзакӏэр къифыхьри...

365. Ӏэнэм къелъэжри тӏысыжащ.

366. Бэдынокъуи щолъэт...

367. Нартхэ ӏэнэми долъей...

368. Ӏэнэр имыгъэсысу...

369. Шыпсыр иримыкӏуту...

370. Шыпс ӏупщӏакӏэр къифыхьри...

371. Шыпс ӏупщӏакӏэм къелъэжри...

372. И тӏысыпӏэми тӏысыжащ...

373. Сосрыкъуэри мэгубжькъэ.

374. И джатэжьри кърехкъэ...

375. Джатэпэмкӏэ щыхетӏэ...

376. Джатэ тӏыгум нырожэри...

377. Джатэ ӏэпщэм щыхетӏэ!

378. Бэдынокъуэри губжьагъэххэт...

379. И джатэжьри кърехкъэ...

380. Джатэ ӏэпщэм щыхетӏэ...

381. Джатэдзэм нырожэри...

382. Джатэ дзапэм щыхетӏэ.

383. Бэдынокъуэри щелъэжкӏэ...

384. Нартыжьхэри зэрогъэкӏийри.

385. - Уэ-уи, уэ-уи, уэ-уи, уэ-уи,

Нартхэ ди Бэдынокъуэ…

386. Нартхэ ди лӏы икъугъэ…

387. Нартхэ гъуазэу къахонэ!