ТЕКСТ ПЕСНИ:
1. Тхьэкӏумащӏэр хуабжьурэ
Бийхэм езэуай,
Самолет зэрыс мыгъуэр
Щӏэуэ ягъэвай.
2. Езыр мыхъужынурэ
Дыркъуэ къытехуащ,
Икӏи Тенджыз Фӏыцӏэм
Ар къыщехуэхащ.
3. Ей тенджыз, тенджыз, жи!
Сэ узифэеплъщ,
Фӏыуэ слъагъуу си псэр
Уи ӏуфэм щыстай.
4. Сэ къыслъыхъуэ плъагъу мыгъуэм
Уэсят схужеӏэж,
Икӏи сэ си хьэдэр
Уэ щӏыпӏэм ихыж.
5. Фӏыуэ слъагъу си хэкум
Сэ сэлам схуефхыж,
Сыщымыгъупщэнурэ
Абы схужефӏэж.
Куба къуажэм щыщ Тхьэкӏумащӏэ Амдулыхь Фин зауэм летчикыу щызэуат, «Красная Знамя» орден абы къыщихьащ. Хэку зауэшхуэр щыщӏидза ипэ махуэхэм бийм пэщӏэувауэ и кхъухьлъатэмкӏэ Ленинград и фронтым щызэуащ. Абы кърагъэкӏри бийр Кавказым къыщыблагъэм, хы Фӏыцӏэм и ӏуфэхэр бийм ящихъумэну къагъэкӏуэжащ. А лъэхъэнэм гушхуауэ къакӏуэ фашист кхъухьлъатэхэм лӏыхъужь мышынэу куэдрэ езэуащ Тхьэкӏумащӏэ Амдулыхь. 1943 гъэм и август мазэм куэд хъууэ къакӏуэ фашист кхъухьлъатэхэм и закъуэ езауэурэ и кхъухьлъатэри къакъутащ, езыри уӏэгъэ къащӏащ. Амдулыхь уӏэгъей пэтми, и кхъухьлъатэ ныкъуэкъутэр ӏэрыхуэу къигъэтӏысыжащ, езыри Щачэ къалэм и сымаджэщым етӏуанэ махуэм щылӏащ. Лӏыхъужьым и хьэдэр ягъэлъапӏэу Щачэ щыщӏалъхьауэ щытащ, ауэ и шыпхъухэмрэ и щхьэгъусэмрэ и кхъащхьэм еплъыну щыкӏуам, Амдулыхь зыхэта частым апхуэдизкӏэ пщӏэшхуэ щиӏати, кхъухьлъатитӏ къратри хьэдэр кърагъэшэжащ, къыщалъхуа Куба къуажэми щыщӏалъхьэжащ. Тхьэкӏумащӏэм зэрихьа лӏыхъужьагъыр къегъэлъагъуэ, абы «Ленин ордену» зырэ «Красная знамя» ордену щырэ къратауэ зэрыщытам.
Уэрэдым и псалъэхэр а лъэхъэнэм зэхэзылъхьауэ щытар Щомахуэ Амырхъанщ. Ауэ псалъэхэр цӏыхум зэрахыхьэу, езыхэм зэрыхуейм хуэдэу уэрэду жаӏащ.
Апхуэдэ лӏыхъужьыр зыми щыгъупщэркъым. Тхьэкӏумащӏэм и фэеплъу мы гъыбзэр зэхалъхьащ. Уэрэдыр къыджезыӏар Дал Фатӏимэтщ. Апщыгъуэ абы илъэс 17-т и ныбжьыр, Куба къуажэм щыпсэурт.
Источник: https://zdamsam.ru/b45257.html
ключевые слова: тхьэк1умащ1эм