Ашэмэз и пшыналъэ

ТЕКСТ ПЕСНИ:

Нартым щӏалэу исхэми кӏэн уэ уакъыдощӏэ, Ашэмэз!

Кӏэнхэр къафӏыбохьыри щӏалэхэр къогъагъыр, Ашэмэз!

- Апхуэдэу улӏыфӏмэ, уиадэр зыукӏами хуомыгъэгъу!

- Сиадэр зыукӏари хэт сэ къызжиӏэну, щӏалэфӏ гуп?

- Уиадэр зыкӏари уианэм къыбжыреӏэ, Ашэмэз!

Ашэмэзыр гъуэгыу ианэм деж къокӏуэжыр, Ашэмэз!

- Укъэзыгъэгъами тхьэр и унэм ибгэ, Ашэмэз!

- Мэжалӏэм сегъалӏэри си ныбэм силӏыкӏынущ, дианэ гуащ!

Мыр, бэджынэ пщтырми тхъу пщтырыр щӏэкӏауэ уэ къысхуэщӏ!

Мыр, бэджынэ пщтырми тхъу пщтырыр щӏэкӏауэ икъуэм хуещӏ.

- ӏэнэм къетӏысылӏи уэри къыхэӏэбэ, сианэ гуащ!

- Сыбдыхэӏэбэнути, ар дэ ди лъэпкъ хабзэкъым, Ашэмэз!

- Укъыхэмыӏэбэу сыхэмыӏэбэнкӏэ уащхъуэ къан!

Ианэри къотӏысыри бэджынэм хоӏэбэ, Ашэмэз.

Ашэмэзыр мапхъуэри бэджынэм иӏэр хеӏур, Ашэмэз.

- А си щӏалэ мыгъуэ, сиӏэр ибогъэсыр, Ашэмэз!

- Диадэр зыукӏари сэ уэ къызжомыӏэмэ, узгъэсынщ!

- Уиадэр зыукӏари ар Лъэбыцэ Жьакӏэщ, Ашэмэз!

Ар хы щӏыбым щыӏэщи, сытым ухуихьын уэ, Ашэмэз?

- Диадэм и шэ ӏэщэхэр пхъуантэшхуэми дэлъкъэ, дианэ гуащ?

- Сэгъындакъыр къапщтэмэ, кӏыпкъыр икъутэнкъэ, Ашэмэз?

- Кӏыпкъыр зэпищӏыкӏмэ пкъохэр щӏэзгъэкъуэнкъэ, сианэ гуащ!

- Афэхэр щыптӏагъэмэ, мафӏэр къыпщӏэнэнущ, Ашэмэз!

- Мафӏэхэр къысщӏэнэмэ, хышхуэм сыхыхьэнкъэ, дианэ гуащ!

- Джатэр щызэгуэплъхьэкӏэ, къижмэ уиукӏынкъэ, Ашэмэз?

- Ӏэпщэр сыубыдынщи, джатэр къизгъэжынкъым, сианэ гуащ!

Диадэм и хуарэжьыр здэщыӏэр уэ къызжыӏэ, сианэ гуащ!

- Уиадэм и хуарэжьри щӏыунэ кӏыфӏым щӏэткъэ, Ашэмэз!

Абрэмывэр ибжэщи, уэ упэлъэщынкъым, Ашэмэз!

Ашэмэзыр макӏуэри хуарэжьыр къыщӏешыр, Ашэмэз.

Хуарэжьым мэшэсри игужьым йохьэжыр, Ашэмэз.