SUBJEKTUA ETA KOMA

Subjektua eta koma

Subjektua ez da komaz bereizten predikatutik; bestela esanda, subjektuaren ostean, salbuespenak salbuespen, ez da koma bakarra jartzen:

Koldok bi liburu ekarri ditu.

*Koldok, bi liburu ekarri ditu.

Horrek guztiak gatazka asko konpondu eta gerrak saihestu zituen.

*Horrek guztiak, gatazka asko konpondu eta gerrak saihestu zituen.

Sagu emeak kantuan aritzen dira sexu-bikotekidea bilatzeko.

*Sagu emeak, kantuan aritzen dira sexu-bikotekidea bilatzeko.

Gai honetaz gehiago jakiteko, hona jo dezakezue.

Poesia

Juan Luis Zabalaren poesia irakurriko dugu gaur

Ez dakit arnasa hartzen.

Ez dakit arnasa hartzen.

Ez dakit jaten eta edaten,

elikatzen eta hidratatzen.

Ez dakit larrua jotzen,

sexuaz gozatzen eta gozarazten.

Ez eserita eta ez etzanda egoten dakit,

hain gutxi zutik irauten, zuzen ibiltzen.

Ez dakit naizena eta daukadana

erabiltzen, kudeatzen, optimizatzen.

Edozein ikastaro nuke lagungarri.

Baina ikasi beharreko guztia ikasteko

bizitza osoa ikasten emanda ere

ez nuke inondik ere aski izango.

Ez dute oraindik asmatu, baina

ikasiaren ikasiz desikasitakoa

berrikasten ikasteko ikastaroak

antolatuko dituztela uste dut,

ikastarorik gabe bizitzen ikasteko.

…eta haren blogeko irakurle batek egiten dion iruzkina:

“Lasterkeriak” lasterreria eragin dik gure garunean. Lasterrago bizi nahiak itorik gaitik. Ez gaituk gauza sufritzeko baizik. Gozamenerako kirioenak egin dik.

Sendatu beharra daukak. Aukera ezak toki lasai bat, zuhaizti bat, parke bat, mendi bat... Eser hadi. Has hadi entzuten nahiz gozatzen Naturak eskaintzen dizkigun soinuez. Txorien txioak; erreken uren hotsak; ume txikien algarak, barreak; egunero elkartzen diren xaharren erran jakintsuak; dasta itzak usainak, entzun itzak. Kendu estresarekiko kablea egunero behin (behinik behin ). Balia itzak une horiek pilak indartzeko.

Bizitza beti bezain eramangaitza izanen duk baina hik, dagoeneko, hire egonarri-dosia ziurtaturik edukiko duk.

Egon bizkor, eta lasai.

Ni ez naiz hemengoa, ezta zu ere. Margotu

PASARTEA

Hirugarren solairuan bizi gara, baina hasieratik debekatu diogu Txisturi igogailuan sartzea, etxepeko bizilagun batek hala egitea eskatu zigunetik. Nirekin batera etxeratzen denean, eskailerak igotzen ari garela, behetik gora begiratzen dit batzuetan, bere ondoan jarraitzen dudala egiaztatu nahiko balu bezala. Horrelakoetan, durduzatu eta gaizki sentiarazten nau haren behetik gorako begirasun apalak, haren lau hankan ibiltze makur umiliagarriak. Horrelakoetan, Txisturen adiskide sentitzen naiz, eta haren altuera berean jarri eta estu besarkatzeko gogoa sentitzen dut.

Txistu eta biok

Juan Luis Zabala