Nork+balio izan

BALIO IZAN

Batzuetan, NOR saileko aditz gisa hartzen da, eta honela jokatzen da: “*hori ez da balio”; hortik erraza da “*niri ez zait balio” ateratzea, eta ondorioz NOR-NORI saileko adizkiak erabiltzen dira. Dena dela, oinarria NOR-NORK sailekoa baita (“horrek ez du balio”), datiboa sartzen delarik jokoan “niri ez dit balio” bezalakoak erabili behar dira.

*Zure apunteak ez zaizkit balio azterketa honetarako.

Zure apunteek ez didate balio azterketa honetarako.

Hartu nire boligrafoa, ea *balio zaizun

Hartu nire boligrafoa, ea balio dizun.

Zuk utzi niri bi liburuak, eta *balio ez zaidana itzuliko dizut

Zuk utzi niri bi liburuak, eta balio ez didana itzuliko dizut

*Eman zenidan disketea ez zitzaidan balio nire ordenagailuan

Eman zenidan disketeak ez zidan balio nire ordenagailuan

Ariketak HEMEN

PASARTEA

Zerua 1

Hegaldiak zortzi ordu iraun zuen, eta ia

beste bi behar izan genituen maletak jaso eta

gure bila etorritako autoa hartzeko. Umeak

nekatuta zeuden, eta gazteenak segituan hartu

zuen lo. Zaharrenak ordea ez. Isil-isilik zihoan,

baina begirik itxi gabe. Eta hala segitu

zuen gure jomugara iritsi ginenean ere. Galde

egin genion azkenean, kezkaren bat ote zeukan.

Berak baietz egin zuen buruarekin. «Ez

ditut ikusi. Hainbeste denbora zerutik barrena,

eta ez ditut ikusi», esan zuen. «Zein ez

dituzu ikusi?», galdetu genion. «Pertsonak»,

esan zuen. «Zein pertsona?» «Hildakoak», zehaztu

zuen.

Bernardo Atxaga

Oharra:

Euskaltzaindiaren arau batek honela dio, laburbilduta:

Nor, ZEIN eta zer singularrerako zein pluralerako erabil daitezke, eta lehentasuna emango diegu. Nortzuk, zeintzuk eta zertzuk (pluralgileak) ere erabil ditzakegu.

Kasu honetan, Atxagak ZEIN ez dituzu ikusi? erabili du, eta ez ZEINTZUK ez dituzu ikusi?