AGURRARI NOLA ERANTZUN

Entzun hemen: http://www.eitb.eus/eu/audioak/osoa/1219520/audioa--ibon-sarasola--agurrak--mezularia/

Euskadi Irratiko elkarrizketa batean Ibon Sarasola euskaltzainari galdetu diote zein den esamolde egokiena agurrari erantzuteko, hau da, egun on esaten dizutenean nola erantzun:

- Erantzun klasikoa, tradiziokoa eta literaturan gehien erabiltzen dena: baita zuri ere, baita hiri ere, baita zuei ere.

- Garai batean, Auspoan eta tankera horretako liburuetan: igualmente erabiltzen zen. Etxean ere bai, ondo lo egin esan eta igualmente erantzuten zen.

- Gero, berdin sartu da. Plaga bat da, denetarako erabiltzen da.

- Dezente erabiltzen da egun on, edo gabon errepikatzea, hitza errepikatuz erantzutea alegia.

Beste aukera batzuk:

- Halan ekarri: ez du entzun, ezta idatziz ikusi ere.

- Egun on deizuela: gehiegizkoa da. Nahikoa da egun on esatearekin.

Garai batean, egun on eta gabon besterik ez zen erabiltzen. Gaur egun, horiez gain, arratsalde on, eguerdi on...erabiltzen dira. Ez zaio gustatzen (egon zen kanpaina bat eguerdi on erabiltzearen kontra).

Gomendioa:

- Egoera formaletan:

Baita zuri ere (hiri, zuei);

Errepikatzea egun on edo gabon.

- *Ez da gomendagarria berdin erabiltzea.

Egoera formaletan zaindu behar dira esamolde horiek, baina intimitatean, norberak aukeratuko du erabiliko duena.

Entzun hemen: http://www.eitb.eus/eu/audioak/osoa/1219520/audioa--ibon-sarasola--agurrak--mezularia/

Poesia eta musika

DASTATU

Tatuatuko nizuke

sua ilean

izotzezko izeberg handi bat

orkatilean.

Gereziak klitorian

mihian taupadak

bizkarreko orno bakoitzean

hotzikara bat.

Zure azala neurtuko

nuke zimurka

titi burutan tatuatzeko

bi atximurka.

Tximeletak sudur puntan

kilimak saman

masail hezurretan zalantza bat:

nork nor daraman.

Arraintxo bat sabeleko

izerdi tantan

izterrean otso bat uluka

ta lau hankatan.

Azazkaletan marraztu

haur bat jolasten

zeuk hautatzeko noiz moztu eta

noiz utzi hazten.

Bekokian bi dezima

inprobisatu

sukar guztiak ezin baitira

teorizatu.

Zirriborratu

nahi dut zurekin

tatuatuko nizukeena

mihi puntarekin. (bis)

Dastatu: Txakur Gorria sormen taldeak, Amaia Cabero Saizar eta Peru Galbete Labianorekin

elkarlanean egindako proiektua.