2020 urtean / 2020. urtean

Itxura batera antzekoak badira ere, zeharo ezberdinak dira bi egitura hauek esanahiari dagokionez:

a) 2020 urtean izugarri aldatu da Iruñea.

b) 2020. urtean izugarri aldatu da Iruñea.

Bien arteko aldeaz jabetu ez bazara, jarraitu irakurtzen.

a) esaldian, iraupena adierazi nahi dugu. Denbora-tarte luzea da markatzen dena: 2020 urteko denbora-tartea, alegia. Gai honen inguruko informazio zabalagoa nahi izanez gero, jo ezazu Euskaltzaindiaren 110. araura: Iraupena eta maiztasuna adierazten duten sintagma zenbatzailedunetan mugatu singularra noiz erabil daitekeen.

b) esaldian, berriz, urte bakar eta jakin bat ari gara seinalatzen: 2020. urtea, alegia.

Beraz, sor litekeen anbiguotasuna saihesteko, urte jakin batez ari garenean oso garrantzitsua da puntua idaztea zenbakiaren eta “urte“ hitzaren artean (eta ahoz ari garenean, berriz, -garren esatea): 2020. urtean (bi mila eta hogeigarren urtean).

OHARRA. Hau guztia “urte” hitza tartekatzen dugunean gertatzen da. Jakina, b) esaldia beste era honetara ere taxutu dezakegu esanahirik aldatu gabe: 2020an izugarri aldatu da Iruñea.