Sacarìa

5

Vision ch’a fà ses: ël ròtol ch’a vola

¹Ant n’àutra vision i l’hai vëddù un ròtol ch’a volava. ²L’àngel a l’ha ciamame: “Còs it vëddes-to? E mi: “i vëddo ‘n ròtol dovert ëd bergamin-a. A l’é longh vint cùbit^[1] e largh des cùbit. ³A l’ha dime: “Col-lì a l’é ‘l document dla maledission ch’a cascherà dzura tut ël pais^[2]. Pr’ esempi: conform a la maledission, tùit ij lader a saran campà fòra da la comunità o, da l’àutra banda, tuti coj ch’a giuro ël fàuss, valendse ëd mè nòm, a patiran l’istess destin. Mi medésim i l’hai lansà costa maledission. I lo diso mi, ël Signor dl’univers. ⁴La maledission a intrerà ant la ca dël làder e ant la ca ‘d col ch’a giura valendse ‘d mè nòm e a resterà an cola ca fin-a che tùit ij sò trav e tute le soe pere a saran brusà”.

Vision ch’a fà set: la cavagna con na fomna andrinta

⁵L’àngel ch’am parlava a l’é vnù a dime: “Àussa j’euj e bèica lòn ch’a compariss”. ⁶E mi: “Còsa ch’a l’é lòn?”. A l’ha rëspondù: “A l’é na cavagna për mzuré ‘l gran^[3]. A l’é pien-a ‘d lòn ch’anciarma tuta la gent dël pais^[4]. ⁷Antlora a l’é duvertasse ‘l covercc ëd piomb ch’a l’avìa dzura, e drinta la cavagna a-i era na fomna. ⁸L’àngel a l’ha dit: “Cola fomna a rapresenta la gramissia!” e l’àngel a l’ha arpussala drinta la cavagna e a l’ha torna sarà ‘l covercc ëd piomb. ⁹Peui i l’hai torna aussà j’euj për vardé e i l’hai vëddù vnì doe fomne ch’a volavo portà dal vent; soe ale a l’ero tanme cole dle sigògne, e a l’han aussà la cavagna an tra la tèra e ‘l cél. ¹⁰I l’hai ciamaje a l’àngel che parlava con mi: “Andova che chile-sì a pòrto adess cola cavagna?”. ¹¹A l’ha rëspondume: “A van ant ël pais ëd Babilònia^[5] për drissé për chila ‘n templ. Quand ch’a l’avran finilo ‘d fabriché, cola fomna a sarà butà an sò tròno^[6]”.

Nòte

1. Ël cùbit ebràich a l’era 44,45 cm. Ël ròtol, parèj a l’era ‘d 8,89 m x 4,445 m. L’idèja a l’era cola d’un lìber ch’a contnìa na gròssa quantità d’anformassion.

2. O “la tèra antrega”.

3. O “efa”(האיפה), na cavagna ch’a contnìa apopré 20 lìter e ch’a servìa coma unità ‘d mzura dël gran.

4. O “a l’han dj’euj mach për lòn”.

5. O “ant la tèra ‘d Senar”.

6. O “pedestal”.