1 Crònache

10

Bataja'd Gilboa e mòrt ëd Saul

¹Ij Filisté a l'han tacà bataja contra d'Israel; ma a son scapaje dëdnans: vàire a son tombà mòrt an sle colin-e'd Gilboa. ²¹Ij Filisté, vnisend anans e anserciand Saul e ij sò fieuj, a l'han massà Giònata, Abinadab e Malchisua, fieuj dël re. ³Peui la sbriva dla bataja a l'é adrëssasse tuta contra 'd Saul: j'arsé a l'han s-ceiralo e ferilo grev. ⁴Antlora Saul a l'ha dije a sò scudié: Tira fòra toa spa e pasme da part a part, ëd manera ch’a sio pa costi nen-sirconcis a feme oltragé. Ma lë scudié, tut sbarùa, për ël gran’ rispet ch’a l’avìa për chiel, a l'ha nen fait përparej. Antlora Saul, ciapà soa spa a l'é campassie ansima. ⁵ Ora, ant ël moment che lë scudié a l'ha vëddù che Saul a l'era mòrt, a l'é campasse a soa vira ansima a soa spa e a l'é massasse. ⁶E parej che Saul a l'é mòrt con ij sò tre fieuj, e tuta soa dinastia a l'é dësparìa con chiel. ⁷Tuti coj d'Israel, ch'a l'ero ant la comba, quand ch'a l'han vëddù che l'esércit israelita a l'era scapà e a l'han savù che Saul a l'era mòrt con ij so fieuj, a l'han chità soe sità ‘d lor e a son scapà a soa vira, përparej ch’ a son vnùit a steie ij Filisté.

⁸A l'é rivaje che,ël di dòp,ij Filisté a son vnùit a dëspojé ij mòrt e a l'han trovà Saul e ij sò fieuj tombà an sla montagna'd Gilboa. ⁹A l'han tajaje la testa e gavaje j'arme, ch'a l'han fait porté an gir për ël pais, nunsiand la bon-a neuva ai sò idoj e a soa gent ëd lor. ¹⁰Lor a l'han butà j'arme 'd Saul ant ël templ dij sò dio, e a l'han tacà l'òss dël cranio ant ël templ 'd Dagon.

¹¹Dël moment che la gent ëd Jabes ëd Galad a l'han antendù lòn che Ij Filisté a l'avijo faje a Saul, ¹²dun-a, tuti j'òmo vajant a son surtì da la sità e a son andait a cheuje ij còrp ëd Saul e dij sò fieuj e a l'han portaje a Jabes, peui a l'han sotràne j'òss sota na pianta 'd Màstich ëd soa sità e a l'han fait digiun për na sman-a.

¹³Saul a l'era andait a meuire përchè nen fidel a Nosgnor: chiel a l'avìa pa guernà Soa paròla e a l'avìa evocà carcaveje për mojen ëd la fìsica 'd na masca, ¹⁴nopà 'd consulté Nosgnor. E 'l Signor a l'ha falo meuire, e a l'ha daje 'l regn a David, fieul ëd Jessé.