Osèa

7

¹Ógni vòlta ch’ i veuj varì Israel, as manifésta la përversità d'Efraim e la colpa 'd Samarìa, përchè lor a pràtico la busiardarìa. A-i é ‘d làder dintra la sità e da fòra a-i é ‘d bandì. ²Lor as na rendo nen cont ch’i peus bin avisemne 'd tute soe gramissie! A son përzoné dij soe euvre medésime e mi i-j ten-o tute sota mè euj.

Cospirassion contra ij re

³Lo a ten-o alégher ij re con soa gramissia e ij cortisan con soe busiarderìe. ⁴A son tùit adùlter, a son parèj d'un forn anvisch, che 'l panaté a l’ha nen da manca ‘d felo brandé da quand ch’a l'ha finì d'ampasté fin-a che la pasta a sia nen alvasse. ⁵Ant ël di dla festa 'd nòst re ij cortisan a s'ancioco e as fan viré la testa, e chiel as buta ansema a coj ch’as arviro. ⁶Ij sò cheur a smijo a ‘n forn anvisch d’antrigh. Sò complòt cova sota la sënner për tuta la neuit, ma a la matin a s-ciòpa parèj d’un feu anfiamà. ⁷Tuti lor a son ëscaudà com un forn e as mangio coj ch’a-j governo. Tùit ij sò re a son tombà. Gnanca un che a crija anvers ëd mi!

Infedeltà teston-a d'Efraim

⁸Efraim as mës-cia a d’àutri pòpoj. Efraim a l'é na fogassa cheuita mach da na banda. ⁹Ëd forësté a ciucio soa fòrsa, e chiel as n’ancòrz pa. S’ij sò cavèj a dvento bianch chiel a lo ved nen. ¹⁰L'orgheuj d'Israel a rend testimoniansa contra 'd chila; ma lor a torno nen vers ëd Nosgnor sò Dé. Malgré tut sòn, lor as arfudo ‘d sercheme. ¹¹Efraim a l'é na colomba gadan-a, ch’a sa nen còsa ch’a sìa ‘l bon sens; lor a ciamo agiut a l'Egit, peui as na van a serchelo an Assiria, ¹²A l’é parèj ch’i-j camperai adòss mia rèj coma ch’as fà quand ch’as veulo ciapé d’osej e a-j faraj casché a tèra damentre ch’a volo. I-j castigherai quand ch’as riunisso.

¹³Maleur a lor, përchè a son ëscapà lontan da mi! A saran devastà përchè ch’a son arvirasse contra ‘d mi. E mi dovria-ne libereje, lor che quand ch’a parlo a fan nen d’àutr che dì ‘d busiardarìe? ¹⁴Quand ch’am ciamo d’agiut a son nen sincer; as lamento dzora dij sò tapiss ëd preghiera; a fan la plenta për ëd gran o për ël vin neuv, ma as arviro contra 'd mi.

¹⁵Combin ch’i sia stàit mi a deje n’istrussion e a feje vnì fòrt, lor a far ëd complòt maléfich contra ‘d mi. ¹⁶As adrësso vers lòn che a l'é gnente^[1]. A son parèj 'd n'arch falèt. Ij sò cap a tomberan vìtime dla spa për motiv ëd soa bërtavela e as rijerà gròss ëd lor ant ël pais d'Egit.

Nòte

1. O “anvers ëd Baal”.