Salm 57

Ij Salm

57. Compatiss-me, mè Dé, compatiss-me; an tì mia ànima a treuva sosta

Ël Salmista a ciama a Nosgnor ch’a lo guerna e a esprim soa fiusa che ij progèt malèfich dij sò nemis ëd sicur a faliran.

¹Për ël diretor dël còro. Un Salm ëd David, riguard al temp che chiel a scapava vìa da Saul për trové sosta ant na balma. Da cantesse conform al ton “Dësbla pa”. Compatiss-me, mè Dé, compatiss-me; an tì mia ànima a treuva sosta. I më stërmerai a l’ombra ‘d toe ale fin-a a tant che ‘l perìcol a sia passà. ²I anvòco ‘l Dé ‘l pì àut^[1], ël Dé ch’a compiss ij sò propòsit an mè favor. ³Chiel a dëstendrà soa man dal cél e am salverà; ij mè përsecutor a saran dësvërgognà. Pàusa. Mè Dé a manifesterà sò amor e soa fidelità.

⁴I son anvironà da ‘d leon feros ch’a l’han anvìa mach ëd divoré ‘d gent. Ij sò dent a son filà tanme ‘d lanse e ‘d flecie, soe lenghe a tajo tanme dë spa.

⁵Mè Dé! Sie esaltà dzura dij céj ij pì àut! Che toa glòria a ‘mpinissa splendrient tuta la tèra. ⁶Ij mè nemis a l’han piassà na rèj për antrapeme. I son sagrinà. A l’han ëscavà na tampa an sël senté ch’i l’hai da passé, ma a saran lor a cascheje ‘ndrinta! Pàusa.

⁷Mè cheur as sent sicur; as sent sicur mè cheur: gnun-a surprèisa ch’i peudo canté toe làude! ⁸Dësvijte, mè cheur! Dësvijève, arpa e lira mia: con mè càntich i dësvijerà l’auròra! ⁹Mi ‘t lauderai an mes a tùit ij popoj; i canterai mie làude an tra le nassion! ¹⁰Tò amor a l’é grand fin-a al cél, toa fidelità a riva fin-a a le nìvole.

¹¹Mè Dé! Sie esaltà dzura dij céj ij pì àut! Che toa glòria a ampinissa splendrient tuta la tèra!

Nòte

1. Ël tìtol divin “L’Altissim” (עֶלְיוֹן, ʿelyon).