Salm 96

Ij Salm

96. Canté a Nosgnor un càntich neuv!

Ël Salmista a 'vita tùit a laudé Nosgnor, ël sovran Creator dël mond ch'a dësfend e manda anans ant ël mond la giustissia

¹Canté a Nosgnor un càntich neuv! Canté a Nosgnor, tuti vojàutri, j’abitant dla tèra! ²Canté a Nosgnor! Laudé Sò Nòm! Nunsié tùit ij dì la bon-a neuva dla salvëssa! ³Fé conòsse^[1] a tute le nassion la glòria 'd lòn che Chiel a fa! ⁴Grand’ a l'é Nosgnor e franch degn d'esse laudà. Sò terìbil grandeur a fà vnì spàlid tùit j'àutri dé, ⁵përchè ij dé dj'àutre nassion a son ëd gnun valor, ma a l'é stàit Nognor ch’a l’ha fàit ël cél. ⁶Onor e majestà a-j stan dantorn, fòrsa e blëssa a 'mpinìsso sò santuari.

⁷Ò nassion dël mond, arconòsse Nosgnor! Arconòsse ch' Nosgnor a l'é glorios e fòrt! ⁸Dé a Nosgnor la glòria ch'a merita! Porté vòstre oferte e vnì ant soe cort. ⁹Adoré Nosgnor an tut Sò splendor sant! Che tuta la tèra a tërmola dnans ëd Chiel! ¹⁰Dì a tute le nassion: "Nosgnor a regna!". Ël mond a sta frem e a peul nen esse socrolà. Chiel a giudichrà ij pòpoj con giustissia^[2].

¹¹Che ij céj as arlegro e la tèra a 'rgiojissa! Ch’a crìa Soe làude 'l mar e tut lòn ch'a-i l'é 'ndrinta! ¹²Che ij camp e le mësson a sprìcio 'd gòj! Che tùit j'erbo dle foreste a sursorìsso con ëd làude, 96:13 përchè Chiel a l'é 'n camin ch'a ven. Chiel a ven a giudiché la tèra. A giudicrà 'l mond con giustissia e le nassion con soa vrità.

Nòte

1. O "conté".

2. O "con imparsialità", "a farà le còse giuste"