Osèa

4

Nosgnor a acusa soa gent

¹Scoté la paròla 'd Nosgnor, gent d'Israel, përchè Nosgnor a l'é an càusa con coj ch’ a stan ant ël pais: a-i é pa fedeltà nì grinor, e gnanca conossensa 'd Nosgnor ant ël pais, ²mach ëd fausserìe, busiardarìe, sassinagi e rubarissi, adulteri e violensa, e 'l sangh ëspantià as mës-cia con d'àutr sangh ësbardlà. ³A l'é për lòn che 'l pais a l'é an deul e tùit coj che a-i ëstan a deperisso, fin-a le bestie dij camp e j'osej dël cel, e fin-a ij pess dël mar a spariran.

⁴Përtant che gnun a fasa 'd process, gnun-a reprimenda! Përchè a l'é con ti, ël sacerdòt, che mi i son an càusa. ⁵Ti të straubaceras ant ël pien dël di, e 'dcò 'l profeta a s'antraperà, la neuit con ti, e mi i farai meuire toa mare^[1]. ⁶Mia gent a meuir përchè ch’am conòss pa. E a ti, ch’it l’has nen vorsume conòsse, it arfuderai tò sacerdossi. Përchè ch’it l'has dësmentià la lej ëd tò Dé, ëdcò mi i dësmentierai ij tò fieuj. ⁷Tuti, vàire ch’ a son, a l'han pëccà contra 'd mi, a l'han cambià soa Glòria con l'Ónta. ⁸As nurisso dij sacrifissi che mè pòpol a smon-a për ij sò pëccà, a son galup ëd soe colpe. ⁹Ma a në sarà dël sacerdòt parèj dla gent: i-j farai sconté soa condòta, e i-j pagrai për soe euvre. ¹⁰Lor a mangeran, ma as gavran pa la fam, as prostituiran, ma sensa esse dru, përch’ a l'han chità mi, ël Signor, e a l’han nen vorsume scoté.

Giudissi dla idolatrìa dle mistà pagan-e e dël cult dla prostitussion

¹¹Le bagasse e ‘l vin a fan perde ‘l bon sens. ¹²Mia gent a consùlta sò tòch ëd bòsch, a l'é sò baròt che a-j dà le drite përchè në spìrit ëd prostitussion a-j fà falì la stra, e lor as prostituisso, slontanandse da sò Dé. ¹³An sël cò dle montagne lor a fan sacrifissi, an sle colin-e a bruso d'incens, sota la rol, j'arbre e ij terebint përchè soa ombra a l'é bon-a. Për lòn vòste fije as prostituisso e vòste nòre a fan d’adultéri. ¹⁴Tutun, i ciamerai nen cont për la prostitussion ëd vòstre fije, nì për l’adulteri ‘d vòstre nòre, përchè lor medésim, ij sacerdot, as na van da banda con ëd bagasse, con ëd bagasse sacrà a smon-o ‘d sacrifissi. A l’é ‘n pòpol sensa sens ch’a va drit a la përdission.

¹⁵Se ti, Israel, it pràtiche la prostitussion, che almen Giuda as na renda pa colpèivol. Andé nen al santuari ‘d Ghilgal, monté nen a Bet-Aven e giuré pa për la vita ‘d Nosgnor.

¹⁶Tanme na vaca ch’as lassa nem domëstié^[2], l’istess Israel as lassa nen buté al pass. Dun-a Nosgnor a la pasturerà tanme dij babèro ant ëd prà dovert. ¹⁷Coj d’Efraim a l’han fàit n’aleansa con j’idoj. Lasseje fè! ¹⁸Dòp tanta prostitussion, a l’é passaje la cioca. Lor a l’han pì car ël dzonor che la dignità! ¹⁹A saran portà via an sj’ale dël vent e a l’avran onta dij sò sacrifissi^[3].

Nòte

1. וְדָמִיתִי אִמֶּךָ vëdamiti ’immeca: “...e mi i dëstruerai soa mare”.

2. סָרַר, sarar :ch'a l'é arvirasse opùra teston עַתָּה ’attah : “dun-a”

3. זִבְחוֹתָם zivcotam: “autar,sacrifissi 'd lor”