Amos 6

6

Për jë sgnor la festa a l’é finìa

6:1 Maleur a coj che as në stan pasi an Sion, a coj che as sento pien ëd fiusa an sla montagna 'd Samarìa! Coj cacam ëd le primìssie dle gent andova che a va tut ël mond d'Israel! 6:2 "Passé a vëdde a Calne, sòn a diso, e d'ambelessì andé a Amat, la gròssa e da là cale a Gat dij Filisté. Son-ne, miraco, mej 'd costi regn? Sò teritòri é-lo pì gròss dël vòst?" 6:3 Vojàutri i pense dë slontané 'l di dël maleur e nopà i presse 'l di dla violensa! 6:4 Cogià dzora 'd let d'avòri e slongà ansima a 'd sofà, lor a mangio ij babero dlë strop e ij vailèt dël cabial. 6:5 lor a brajo al son ëd l'arpa, tanme David, a fan ëd mùsica; 6:6 a bèivo 'l vin ant le cope larghe, as fërto con ij përfum pì bon, ma as sagrin-o pa për la sòrt ëd Giusep! 6:7 A l'é për lòn che, quand a saran mnà an esili, lor a saran ëdnans a tùit e con lor a finiran ij dësbaucià!

6:8 Nosgnor a l'ha fàit chiel midem giurament: "Nosgnor, ël Dé che a comanda j'armeje, a l'ha parlà: "I l'hai an ghignon l'orgheuj ëd Giacòb, i detesto soe fortësse. Për sòn i farai ocupé la sità 'd Samarìa dai nemis, e tut lòn che a-i é andrinta". 6:9 Se a-i resto bele mach des òmo drinta a na ca sola: che a meuiro. 6:10 Mach un cit nùmer a survivran për fé seurte ij drocheri da la ca: e, se as dirà a col che a l'é ant ël fond ëd la ca: "É-lo pì gnun con ti?", chiel a dirà: "Pì gnun!" E l' àutr a dirà: "Stà ciuto! Venta pa nominé Nosgnor"! 6:11 Va bin, varda lòn che Nosgnor a comanda: ëd fé a tòch la ca granda e dë sbrisé la cita. 6:12 Miraco che ij cavaj coro-ne an sjë scheuj o che as làura 'l mar con ij beu? Përchè voi i cambie 'l dirit con ël tòssi e 'l frut dle bon-e assion ant j'erbe mère! 6:13 Vojàutri i argioisse con ël Gnente, voi i dise: "É-lo pa për nòstra fòrsa che nojàutri i l'oma ciapà Carnaim"? 6:14 Ora, vardé che mi i fas ës-ciòde contra 'd vojàutri, famija d'Israel, Nosgnor, ël Dé ch'a comanda j'Armeje, a parla - na nassion che av craserà da l'intrada d'Amat fin-a al torent ëd l'Araba.