Salm 47

47. Vnì, vojàutri ij pòpoj dël mond!

An cost ìmn la comunità dl’Aleansa a làuda Nosgnor coma ‘l rè magnificà an tuta la tèra, ch’a l’ha daje vitòria an sle nassion e na tèra për vivje.

¹Pr’ ël diretor dël còro. Un salm dij dissendent ëd Coré. Vnì, vojàutri ij pòpoj dël mond! Bate le man! Aclamé Dé con crij ëd gòi! ²Përché Dé a l’é ‘l pì àut: ij sò nemis a l’han bin da avèjne tëmma! Chiel a l’é ‘l gran Rè ‘d tuta la tèra. ³Dëdnans a noi chiel a sogeta ‘d nassion e a buta ij nòstri nemis sota ij nòstri pé. ⁴A l’ha sernù për nojàutri na tèra, nòstra ardità, l’orgheuj ëd Giacòb, che chiel a-j veul bin. [Pàusa].

⁵Dé a monta an àut an mes d’aclamassion, al son dij còrn a monta Nosgnor. ⁶Canté, canté a Dé! Canté ‘d làude a nòst Rè, canteje ‘d làude! ⁷Dé a l’è Rè ‘d tut ël mond. Laudelo con un salm. ⁸Dé a regna dzura dle nassion, a l’é astà an sù sò tròno glorios. ⁹Ij cap dij pòpoj a son assemblasse ansema al pòpol dël Dé d’Abram. A l’é che tùit ij rè dla tèra a son ëd Dé. Chiel a l’é magnificà daspërtut.