Numer 10

10:1 Nosgnor a l'ha parlaje a Mosè e a l'ha dit: 10:2 Fate doi trombe d'argent; it-j faras travajé a sbàuss con ël martel. A podran servì a buté ansema la comunità e a deje al campament ël signal ëd partensa. 10:3 Ant ël moment ch'a sonran, tuta la ciambreja as rassëmblerà davzin a ti a l'intrada dla Tenda dël Rëscontr. 10:4 Ma se a në sonerà mach un-a, a saran ij prinsi, ij cap ëd le milen-e d'Israel, che a vniran ansema da ti. 10:5 Ant ël moment che i sonereve n'arson d'aclamassion, ij campament che as treuvo a levant as butran an marcia. 10:6 Cora che i sonereve na sconda vira 'l son d'aclamassion, a saran j'acampament che as treuvo a mesdì che as butran an camin; as soneran arson d'aclamassion quand a dovran butesse an marcia. 10:7 Ant ël moment che a dev esse convocà la comunità, i sonereve, ma pa n'arson d'aclamassion. 10:8 A saran ij prèivi, fieuj d'Aron a soné le trombe; a sarà na lej sensa fin për vojàutri e vòstra posterità. 10:9 Quand che ant ël vòst pais voi i dovreve parte an guera contra un nemis che 'v crasa, antlora vojàutri i sonereve le trombe con n'arson d'aclamassion: Nosgnor vòst Dé as n'aviserà 'd vojàutri e i sareve liberà da vòstri nemis.

10:10 Parèj, 'dcò ant ij vòstri di'd festa, an vòstre solenità o neomenie*, i sonereve le trombe cora che i smonreve d'olocàust e sacrifissi 'd comunion; sòn av memorierà an facia a vòst Dé. Mi i son Signor vòst Dé.

10:11 Dlë scond ann, dlë scond mèis, ël vint dël mèis, la Nìvola a l'é aussasse dzora dla Tenda dël Rëscontr. 10:12 J'Israelita a son partì dal desert dël Sinai conform a sò órdin ëd marcé; la Nìvola a l'é fermasse ant ël desert ëd Paran. 10:13 Vardé-sì coma che a son butasse an marcia, la prima vira, conform ël comand dàit da Nosgnor për mojen ëd Mosè. 10:14 Ël drapò dël camp dij fieuj ëd Giuda l'é col ch'a l'é bogiasse për prim, dividù conform soe unità. Nacson, fieul d'Aminadab a comandava l'armeja 'd Giuda. 10:15 Netanel ben Suar, a comandava l'esércit dij fieuj d'Issacar; 10:16 a la testa dël contingent ëd la tribù 'd Zabulon, conform soe unità, a j'era Eliab fieul ëd Chelon. 10:17 La Tenda a l'é stàita dësmontà e ij fieuj ëd Gherson e coj ëd Merari a son portasse an camin an portand ël Tabernàcol. 10:18 Peui a l'é bogiasse l'ansëgna dël campament ëd Ruben, dividù an soe trope. Elisor ben Sedeur, a comandava l'armeja 'd Ruben. 10:19 Selumiel, fieul ëd Surissadai, a comandava 'l trop ëd la tribù 'd Simeon. 10:20 Eliasaf ben Deuel, a comandava l'armeja dij fieuj ëd Gad. 10:21 Apres a son partì ij fieuj ëd Cheat, an portant d'asi sacrà; j'àutri a dovìo drissé la Ca, anans che costi-sì a rivèisso. 10:22 An séguit ël drapò dël camp d'Efraim a l'é butasse an marcia, a l'era dividù scond soe unità. Elisama, fieul d'Amiod, a comandava la schiera d'Efraim. 10:23 Gamliel ben Pedasor, a comandava l'armeja dla tribù dij fieuj ëd Manasse. 10:24 Abidan, fieul ëd Ghideoni a l'era a la testa dl'esércit dij fieuj ëd Beniamin. 10:25 Apres, a l'é bogiasse l'ansëgna dl'acampament ëd Dan, dividù conform soe unità d'armeja, an formand la retroguardia ' d tùit ij contingent. Achieser fieul d'Amissadai, a l'era al comand ëd l'esércit ëd Dan. 10:26 Paghiel, fieul d'Ocran, a l'era a cap ëd la tropa dla tribù dij fieuj d'Aser, 10:27 e Achira, fieul d'Enan, a comandava l'armeja dla tribù dij fieuj ëd Neftali. 10:28 Cost a l'é stàit l'órdin ëd marcia dj'Israelita, scond soe unità. E a son partì.

10:29 Mosè a l'ha parlaje a Obab, fieul ëd Reuel, Madianita, mëssé 'd Mosè: Nojàutri i soma an camin ëd parte, anvers al pòst che Nosgnor a l'ha dit: A sarà dàit a vojàutri an possess. Ven con nojàutri, e it faroma dël bin, përchè Nosgnor a l'ha promëttù 'd feje dël bin a Israel. 10:30 A l'ha rësponduje: Mi i vnirai pa! Nopà i tornerai a mè pais da mia gent. Mosè a l'ha dit: 10:31 Chita nen nojàutri, për ël motiv che ti 't conòsse ij leugh andova che i butroma camp ant ël desert e it saras nòstri euj. 10:32 Se it ven-e con noi, tut ël bin che Nosgnor a farà a nojàutri, noi i lo faroma a ti!

10:33 Përparèj che a son partì dal mont ëd Nosgnor e a l'han fàit tre di 'd marcia; l'Èrca dl'Aleansa dël Signor a j'andasìa anans për tre di 'd marcia për serchéje un pòst a la sosta. 10:34 La Nìvola dël Signor a l'era pròpi dzora 'd lor ant ël di, dal moment ch'a l'ero partì.

10:35 Cora che l'èrca a partìa, Mosè a disìa:

Àlvte, Nosgnor, e che a sio sbërgiairà ij tò nemis, e coj che a t'òdio ch'a scapo da ti.

Ant ël moment che as posava a disìa:

Torna Signor a le milanta-milen-e d'Israel.