Salm 46

46. Dé a l’é nòst arpar e fortëssa

An cost’ ansidita “Càntica ‘d Sion”, ël pòpol ëd Nosgnor a fortiss con fiusa ch’a stà sicur përchè ‘l gran rè guerié a stà a Gerusalem e a la guerna da le nassion che nel mond a son càusa ‘d granda agitassion. Un refren (vv. 7 e 11) a sara le doe division pì grande dë sto salm.

¹46:1 Pr’ ël diretor dël còro. Na càntica dij dissendent ëd Coré, da dovresse për vos ëd sopranin^[1]. Dé a l’é nòst arpar e fortëssa, sèmper pront a giutene ant l’ora dël privo. ²A l’é per lòn ch’i l’oma gnun-e tëmme quand ch’a ven ël taramòt e ij mont a sfriso e a calo ‘nt ël mar^[2]. ³Che pura j’océan a breugio e a scumo; che pura le montagne a tërmolo e che j’aque as levo! [Pàusa]

⁴Ij brass ëd na rivera a ‘rlegro la sità ‘d Dé, la mison pì sacrà dël pì-Aut. ⁵Dé a l’é an mes ëd chila: a peul pa esse dësblà. Dé a la guarda anans ch’a sponta ‘l dì. ⁶Le nassion a son an confusion e ij sò regn a së sfriso! La vos ëd Dé a tron-a e la tëra as dësfa! ⁷Ël Signor ëd l’univers a l’é con nojàutri; nòstra muraja a l’é ‘l Dé ‘d Giacòb. [Pàusa].

⁸Vnì a vëdde j’imprèise ëd Nosgnor, coma ch’a l’ha causà desolassion dzura dla tèra. ⁹Chiel a fà chité le guère për tuta la tèra; a l’ha s-ciapà j’arch e le lanse; a l’ha daje feu a jë scu.

¹⁰Sté chiet e arconosse che mi i son Dé: i sarai onorà da tute le nassion; i sarai onorà për tut ël mond. 4:11 Ël Signor ëd l’univers a l’é con nojàutri; nòstra muraja a l’é ‘l Dé ‘d Giacòb [Pàusa].

Nòte

1. O “Alamòt”.

2. O “ant ël creus dël mar”.