Surtìa

39

Le vestimente sacerdotàj: l’Éfod

¹J’arté a l’han confessionà ‘d bele vestimente sacrà ‘d pórpra violeta, vermeja e scarlata - vestimente ch’a-j portèissa Aron quand ch’a ufissiava ant ël santuari, pròpi coma Nosgnor a l’avìa comandaje a Mosè.

²Bessalel a l’ha fàit l’éfod con òr, porpra viòla, porpra rossa, ëscarlat e damasch antorzù, soasì con art. ³A l’han fàit bate ‘d làmine d’òr fin e a l’ha tajaje a fij për antërseje an ël tëssù pórpra violet, vermèj e scarlat e ant ël lin fin për fene ‘n travaj d’art. ⁴A l’han fàit doi tirant ch’a tachèisso l’éfod a le spalin-e da le doe stremità; ⁵la sintura decorativa fàita dj’istess materiaj, a l’era ‘d lin tessù ‘d manera fin-a, brodà con òr e con fil color bleu, porpra e scarlata, pròpi coma Nosgnor a l’avìa comandaje a Mosè. ⁶Peui a l’ha ancassià le pere d’ònis an montadure d’òr e a l’han gravaje dzura ij nòm dle tribù d’Israel dl’istessa manera che j’oréfiss a gravo le pere pressiose. ⁷Peui a l’ha fissà le doi pere an sle spalin-e dl’éfod coma ‘n memorial dle dódes tribù, pròpi coma Nosgnor a l’avìa comandà a Mosè.

La Petorin-a

⁸Bessalel a l’ha ‘dcò fàit la petorin-a travajà ‘d manera soasìa, l’istess che l’efod, l’é a dì con d'òr, porpra viòla, porpra rossa, ëscarlat e damasch artorzù. ⁹A l’avìa na forma quadrà, ëd mesa branca për fianch. ¹⁰A l’ha guarnija con quatr file ‘d pere pressiose: an la prima fila na cornalin-a, un topass e n'ësmerald; ¹¹an sla sconda: na turchin-a, un safir e un beril; ¹²an sla quarta: un crisolit, n'óniss e un diaspr. Cata pera a l’era ancassià ant na montadura d’òr. ¹³An total a j’ero dódes pere coma ch’a son dódes le tribù d’Israel. ¹⁴Minca na pera a portava ‘l nòm d’un-a dle dódes tribù, gravà coma ch’ij bisotié a fan con ij cacet.

¹⁵A l’ha fàit për la petorin-a dle filagran-e d’òr pur tressà an forma ‘d cordon, ¹⁶e ‘dcò doi anej d’òr a le doi stremità dë dzora dla petorin-a. ¹⁷Apress a l’ha faje passé ij doi cordon d’òr për ij doi anej dlë stremità dla petorin-a. ¹⁸A l’ha fissà ij cap dij doi cordon a le montadure an sël dnans dle spaline dl’éfod. ¹⁹A l’ha fàit ancora doi anej d’òr e butje a le doi stremità dla part interna dla petorin-a, cola ch’a toca l’éfod. ²⁰A l’ha fane doi ëd pì fissà a le doe spalin-e dl’éfod, sota an sël dnans, tocand soa giontura, dzura dla sintura dl’éfod. ²¹A l’ha gropà j’anej dla petorin-a a j’anej dl’éfod con un cordon ëd porpra viòla, ëd manera che la petorin-a stasìa dzura dla sintura dl’éfod e as jë dëstacava nen, pròpi coma Nosgnor a l’havìa comandà a Mosè.

La Mantlin-a

²²La mantlin-a ch’a l’avìa da sté dzura dl’éfod a l’ha fala tuta ‘d pórpra violeta. ²³Al mes a l’avìa na dovertura për feje passé la testa, con l’orlo tut an broa e tëssù tanme l’arfial ëd na corassa, për chè a vada nen a s-cianchesse. ²⁴Tut dantorn a l’orlura ‘d sota dël mantel a l’ha fàit ëd pom granà ‘d porpra rossa, viòla e d’ëscarlat. ²⁵A l’ha fàit ëd sonaje d’òr an tra un pom granà e l’àutr a l’orlura dël mantel. ²⁶Sossì a sërvìa për ël moment d’ufissé pròpi coma Nosgnor a l’avìa comandà a Mosè.

D’àutre vestimente

²⁷Apress a l’ha fàit antësse le tùniche për Aron e për ij sò fieuj, ²⁸ël turbant ch’a gropa ij cavèj, ij bindej dij caschèt ëd lin, le braje bin filà da portesse sota; ²⁹le fasse ‘d lin bin filà, brodà con fij tensù ‘d pórpra violeta, vermèja e scarlata, pròpi coma Nosgnor a l’avìa comandà a Mosè.

³⁰A la fin a l’ha fàit na làmina d’òr pur e a l’ha fàit gravé, coma ch’a fan j’oréfiss con ij cacèt, coste paròle: “Sacrà a Nosgnor”. ³¹Peui a l’ha fissala con un cordon ëd porpra viòla al ëdnans dël turban, pròpi coma Nosgnor a l’avìa comandà a Mosè.

Presentassion dl’euvra a Mosè

³²A l’é parèj ch’a l’é terminà l’euvra dël Tabernacol antè ch’a-i era la Tenda dël Rëscontr. J’Israelita a l’han falo precis coma Nosgnor a l’avìa comandà a Mosè. ³³A l’han presentà a Mosè ël Tabernacol con tùit ij sò asi, ij sò crocèt, le plancie e le travërse, ij pianton e ij sò sòcoj, ³⁴le coverture ‘d pèil ëd feja tensùe ‘d vermej, la covertura ‘d pèl ëd delfin e ‘l ridò ch’a separava ‘l leugh santissim; ³⁵l’Érca ch’a conten lë Strument dl’Aleansa con soe stanghe për trasportela, e ‘l Cover-cc dël Përdon; ³⁶la Tàula dël Pan dl’Oferta con tùit ij sò asi; ³⁷la Girindòla d’òr pur con ij sò cales për le lampie, tùit ij sò asi, e l’euli d’oliva për mantnije anvische; ³⁸l’autar d’òr, l’euli d’onsion santa, l’ancens aromàtich e ‘l ridò dl’intrada dla tenda; {{verse|chapter=39|verse=39}l’autar ëd bronz con soa grija ‘dcò ‘d bronz, soe stanghe për trasportelo, e tùit ij sò asi; ël lavàbos con sò sòco; ⁴⁰le tèile dla cort con ij sò pianton e ij sò sòcoj; ël ridò dl’intrada dla cort; le còrde, ij pichet e tuti j’asi për ël servissi dël Tabernacol, për la Tenda dël Rëscontr; ⁴¹j’ornament cultuaj për ufissié ant ël santuari, le vestimente sacrà për ël sacerdòt Aron e le vestimente dij sò fieuj për l’esercissi dël sacerdòssi.

⁴²J’Israelita a l’han butà an esecussion tuta l’euvra pròpi coma Nosgnor a l’avìa comandà a Mosè. ⁴³Mosè a l’ha fàit n’ispession ëd tuta l’euvra e a l’ha comprovà ch’a l’avìo fàita precis coma Nosgnor a l’avìa ordinaje. Mosè, donca, a l’ha benedije.