Salm 60

Ij Salm

60. Nosgnor! It l’has arpossane e sbërgiairane

'Ël Salmista a ringreta l’umiliassion dla dësfàita d’Israel, ma cora ch’a sent le paròle sicurante ‘d Nosgnor, chiel a sùplica che Dé a-j giuta an bataja e a manifesta soa fiùsa an la vitòria.

Pr’ ël diretor dël còro: un Salm ëd David ch’a va bin për dotriné, riguard al temp che David a combatìa contra j’Aramé ‘d Naaraim e ‘d Sobà, e quand Gioab a l’é tornà e a l’ha butà an derota dódes mila Edomita ant la Val dla Sal. Da cantesse conform al ton ëd “Liri dla testimoniansa”

¹Nosgnor! It l’has arpossane e sbërgiairane. It ses anrabiate contra ‘d nojàutri, ma ora ristabiliss-ne an tò favor. ²It l’has socrolà nòstra tèra e ‘d chërpure a son dovertasse. It suplicoma: torna a rangela, dësnò tut a crolerà. ³It l’has sogetà tò pòpol a ‘d preuve motobin dure, it l’has ambriacalo con ël vin ch’it l’has daje da bèive. ⁴Ma për ij tò fedej it l’has alvà ‘n drapò për feje vëdde ‘l leugh anté ch’a peudo trové na sosta da j’atach dij nemis. Pàusa. ⁵Donca, lìbera coj ch’it veuje bin. Salv-ne con toa potensa^[1]! Rëspond-ne!

⁶La promëssa che Nosgnor a l’ha fane an soa santità^[2] a l’é: “I stravincerai! I spartirai Sichem e mësurerai la val ëd Sucot. ⁷Galaad a l’é mia, a l’é mé Manasse. Efraim a l’é l’elm ch’am quata. Giuda a l’é mia cavija regal. ⁸Ma Moab, ch’a l’é tanme mè lavandin, a dventerà mè servent, e con Edom i pnasserai mie sàndole! I alverai ‘d crij ëd trionf dzura la Filistìa”.

⁹Chi é-lo ch’am mnerà a la sitadela fòrta? Chi é-lo ch’am farà vince Edom? ¹⁰Pròpi ti, Signor, ch’it l’avìe arpossane e ch’it sortie pì nen a combate con ij nòstri armà.

¹¹It suplicoma: giutne contra ij nòstri nemis, përchè l’agiut ch’i podrìo arsèive da j’òm a serv pròpi a gnente. ¹²A l’é con l’agiut potent ëd Nosgnor ch’i faroma grand’ imprèise: pròpe chiel a sbërgnacherà ij nòstri nemis.

Nòte

1. Let. “con tò brass”.

2. O “da sò santuari”.