Ij nùmer

8

La Girindòla

¹Nosgnor a l’ha parlà ancora a Mosè. A l’ha dije: ²“Faje savèj sossì a Aron: ‘Quand ch’it anvischeras le set lampie, a sarà an sël danans ëd la girìndola che le set lampie a dovran proiëtté sò ciàir’”. ³E parèj a l'ha fàit Aron. Chiel a l'ha butà le lampie da la part danans ëd la Girìndola, coma che Nosgnor a l'avìa comandaje a Mosè. ⁴Cost candlé a l'era n'euvra d'òr travajà a sbàuss da sò bion a soa coron-a, a l'era na ciadeuvra ùnica sbalsà a martel. Costa girìndola a l'era stàita conform al model che Nosgnor a l'avìa mostraje a Mosè.

Dedicassion dij Levita

⁵Nosgnor a l’ha parlà ancora a Mosè. A l’ha dije: ⁶“Separa ij Levita da j’àutri Israelita e purifichje. ⁷Për purificheje, fà ‘n costa manera: ansima a lor fà n’aspersion con l’eva ch’a purifica dal pëccà^[1]. As raseran peuj tut ël còrp e a laveran soe vestimente. A l’é antlora ch’a saran pur. ⁸Apress, a ciaperan un vailèt, con l'oblassion giontà a fior ëd farin-a con l'euli. Ti pija n’àutr vailèt pr’ ël sacrifissi pr’ ël pëccà. ⁹Fà ch’ij Levita as acòsto dëdnans la Tenda dël Rëscontr, e cònvoca tuta la comunità d’Israel. ¹⁰Ant ël moment che ti't faras vnì anans ij Levita danans al Signor, j'Israelita a faran amposission ëd le man dzora 'd lor. ¹¹Antlora Aron a presentrà dëdnans a mi ij Levita an fasend ël gest ëd presentassion dëdnans a Nosgnor da la part dj'Israelita. Da col moment lor a saran efetiv al servissi dël Signor. ¹²Apress ij Levita a pogeran la man an sla testa dij vailèt, e a sarà fàit ëd na bestia un sacrifissi për ël pecà, con l'àutra n'olocàust a Nosgnor, për podèj compì ansima ai Levita 'l rit d'espiassion. ¹³Ij Levita as butran peui dëdnans Aron e sò fieuj e ti't-j smonras a Nosgnor con gest ëd presentassion. ¹⁴Përparèj ti 't butras da banda ij Levita separandje da 'n mes dj'Israelita: lor a son mè.

¹⁵Ij Levita, purificà e presentà parèj dëdnans a mi, a intraran al servissi dla Tenda dël Rescontr. ¹⁶A resteran a mia disposission, già ch’am an son donà për j’Israelita al pòst dij sò prim-génit. ¹⁷Tùit ij prim-génit dj’Israelita e tùit ij prim-génit dle bestie am aparten-o: i l’hai consacraje a mi ël dì ch’i l’avìa fàit meuire tùit ij prim-génit dël pais d’Egit, ¹⁸A l’é për lòn ch’i son arzervame ij Levita al pòst dij prim-génit dj’Israelita. ¹⁹I l'hai donaje ad Aron e ai sò fieuj, ij Levita an tra j'Israelita, përchè a faso 'l servissi dij fieuj d'Israel ant la Tenda dël Rëscontr e përchè a compisso 'l rit espiatòri për ij fieuj d'Israel, përchè gnun-a ruin-a a peussa frapé j'Israelita, ëd vòte mai a s'avzinèisso al Santuari.

²⁰Mosè, Aron e tuta la comunità d’Israel a l’han fàit precis tut lòn che Nosgnor a l’avìa comandaje a Mosè riguard ai Levita. ²¹Ij Levita a son purificasse, a son lavasse soe vestimente e peui Aron a l’ha presentaje dëdnans al Signor e a l’ha fàit për lor ël rit d’espiassion për purificheje. ²²Apress, ij Levita a son ëstàit amëttù a fé servissi ant la Tenda dël Rëscontr an presensa d'Aron e dij sò fieuj. Conform a lòn che a l'avìa prescrit a Mosè për ij Levita, parèj a l'è fasse për lor.

Temp dël servissi dij Levita

²³Nosgnor a l’ha parlaje ancora Mosè e a l’ha dije: ²⁴“Ij Levita a intreran a prestar servissi ant la Tenda dël Rëscontr da l’età ‘d vintesinch agn an sù. ²⁵Ant ël compiment dij sinquant’ agn, as artireran dal servissi ativ e a l’avran pa pì ‘d funsion. ²⁶A podran giuté j’àutri Levits ativ an fasend la vardia a la Tenda dël Rëscontr, ma a presteran gnun àutri servissi. Stabiliss parèj ël servissi dij Levita.

Nòte

1. A la létera cost’espression (חַטָּאת khattaʾat) a l’é “j’aque dël pëccà”. A parëss che l’eva a l’era cola ciapà dal bassin prinsipal dël Tabernacol e a contrasta con ël lavagi complèt dij sacerdòt an Levitich 8:6.