Levìtich

4

Ij Sacrifissi për ij pëccà involontari

¹Nosgnor a l’ha parlà ancora a Mosè. A l’ha dije: ²“A j’Israelita dije parèj: Quand quaidun ëd vojàutri a comëtt sensa volèjlo n’assion ch’a l’é proibìa da ‘n quai comandament ëd Nosgnor, fé sossì: ³Se col ch’a l’ha comëttù la trasgression a l’é ‘l grand sacerdòt midem, as trata ‘d na colpa ch’a rend colpèivol tut ël pòpol. Antlora chiel a l’ha da smon-e a Nosgnor coma sacrifissi për l’espiassion dël pëccà un bocin sensa difèt. ⁴A lo porterà a l’intrada dla Tenda dël Rëscontr, a-j butrà la man an sla testa e a lo sgorzerà dëdnans a Nosgnor. ⁵A ciaperà peui ‘l sangh dël vailèt e a lo porterà drinta dla Tenda dël Rëscontr; ⁶a mojerà ‘l dil an col sangh e, a la presensa ‘d Nosgnor, a farà set aspersion dëdnans a Nosgnor an facia dël ridò dël Santuari. ⁷Apress, a la presensa ‘d Nosgnor, a onzrà con ël sangh ij canton dl’autar dl’ancens aromàtich ch’as treuva ant la Tenda dël Rëscontr. Lòn ch’a vansa dël sangh dël vailèt a lo vërsrà ai pé dl’autar dj’olocàust ch’a-i é a l’intrada dla Tenda. ⁸Peui a gaverà tuta la grassa dël bocin smonù an sacrifissi d’espiassion për ël pëccà, l’é a dì, la grassa ch’a-i é ansima ai buej, ⁹ij doi rognon con la grassa ch’a l’han ansima fin-a ai fianch e al lomb dël fidich ch’a dëstracrà dzora dij ren. ¹⁰A farà coma ch’as fà con ël beu dij sacrifissi ‘d comunion, e ‘l sacerdòt a lo bruserà an sl’autar dj’olocàust. ¹¹Ma për lòn ch’a riguarda la pel dël vailèt e tuta soa carn, con sò malèt, soe piòte, soe ventraje e ij sò buej con j’escrement, ¹²visadì tut lòn ch’a vansa dël vailèt, a lo farà porté fòra dal campament, ant un leugh pur da la mira ritual, andova ch’a së spantio le sënner, e la lo bruserà an s’un feu ‘d bòsch. A dovrà esse brusà an sël baron dla sënner.

¹³S’a l’é tuta la comunità d’Israel ch’a l’ha fàit n’assion proibìa da quaidun dij comandament ëd Nosgnor, a l’é renduss-ne colpèivola bele s’ a l’avèissa fàita sensa rendse cont. ¹⁴Quand ch’as conòss la trasgression fàita, la comunità a l’avrà da smon-e un vailèt ciapà da la strop gròss coma ‘n sacrifissi për l’espiassion ëd col pëccà, e a lo porterà dëdnans dla Tenda dël Rëscontr. ¹⁵J’ansian dla comunità a butran soe man ëd lor an sla testa dël bocin che parèj a sarà sacrificà dëdnans a Nosgnor. ¹⁶Ël grand sacerdòt a porterà dël sangh dël bocin ant la Tenda dël Rëscontr, ¹⁷a meujerà ël dil an col sangh e, a la presensa ‘d Nosgnor, a na farà l’aspersion set vire dëdnans al Ridò ch’a separa ‘l leugh sant dal leugh santissim. ¹⁸Apress, a onzrà con ël sangh ij canton dl’autar ch’a-i é dëdnans a Nosgnor. Tut lòn ch’a vansa dël sangh, a sarà vërsà ai pé dl’autar dj’olocàust ch’a-i é a l’intrada dla Tenda. ¹⁹Peui a gavrà tuta la grassa dël vailèt e a la farà brusé an sl’autar. ²⁰Ëd cost vailèt a farà precis ch’a l’ha fàit con ël bocin smonù coma sacrifissi d’espiassion për ël pëccà. Quand ël sacerdòt a l’avrà fàit la sirimònia d’espiassion për la comunità, la trasgression a sarà përdonà. ²¹Apress ëd lòn, tut lòn ch’a vansa dël vailèt a lo farà porté fòra dël campament e a lo brusrà parèj com a l’avìa brusà ‘l prim bocin. Sto-sì a l’é ‘l sacrifissi për ël pëccà dla comunità.

²²S’a l’é stàit un dij cap, che, sensa rendse cont, ha l’ha fàit na quai assion proibìa da quaidun dij comandament ëd Nosgnor, ël sò Dé, a l’ha comëttù na trasgression. ²³Ant ël moment che sò pëccà a sarà portà a conossensa, a mnera un boch giovo ch’a l’abia gnun difèt da lë strop dle cavre. ²⁵A poserà soa man an sla testa dël boch e a lo sgorzerà dëdnans a Nosgnor, ant ël leugh anté ch’a së sgòrza le vìtime smonùe an olocàust. Lolì a l’é ‘n sacrifissi për l’espiassion dël pëccà. ²⁵Ël sacerdòt a mojerà ‘n dil ant ël sangh dël sacrifissi d’espiassion e a na onzrà ij canton dl’autar dj’olocàust. Lòn ch’a vansa dël sangh a sarà vërsà ai pé dl’autar. ²⁶Peuj a bruserà tuta la grassa an sl’autar, coma ch’as fà con ij sacrifissi ‘d comunion. Quand che ‘l sacerdòt a l’avrà fàit la sirimònia d’espiassion për un dij cap, la colpa a-j sarà përdonà.

²⁷Se quaidun d’àutri, sensa rendse cont, a fà n’assion proibìa da quaidun dij comandament ëd Nosgnor, ëdcò chiel a l’ha fàit na trasgression, ²⁸ch’a sia avertì dël pëccà ch’a l’ha comëttù e chiel a l’avrà da porté an oferta na crava giovo, sensa macia an sacrifissi d’espiassion për ël pëccà. ²⁹A butrà soa man an sla testa dla vìtima e peui a la sgorzerà ant ël leugh andova ch’a së sgòrzo j’olocàust. ³⁰Ël sacerdòt a mojerà ‘l dil ant ël sangh e a na onzrà ‘d sangh ij canton dl’autar dj’olocàust. Apress a vërsrà lòn ch’a vansa dël sangh ai pé dl’autar. ³¹Tute le part grasse a saran prelevà parèj com as gava la grassa dal sacrifissi ‘d comunion, e ‘l sacerdòt a lo bruserà an sl’autar coma n’oferta d’odor agreàbil a Nosgnor. Quand ël sacerdòt a l’avrà fàit la sirimònia d’espiassion për cola përson-a, la colpa a sarà përdonà. ³²Se an leu ‘d na crava a së smon-a na feja coma sacrifissi për ël pëccà, a l’avrà pa d’avèj ëd difet. ³³A butrà la man an sla testa dla vìtima e peui a la sgorzerà an sacrifissi për ël pëccà ant ël leugh anté ch’a së sgòzo le vìtime oferte an olocàust. ³⁴Ël sacerdòt a mojarà ‘l dil ant ël sangh dla vìtima e a n’onzrà ij canton dl’autar dj’olocàust. Apress a vërserà tut ël sangh ch’a l’é vansà ai pé dl’autar. ³⁵Peui a preleverà tùit ij tòch ëd grassa, parèj com as separa l’eivo dla feja dël sacrifissi ‘d comunion, e ‘l sacerdòt a lo bruserà an sl’autar, dzura dle vìtime consumà an onor ëd Nosgnor. Quand ch’ ël sacerdòt a l’avrà fàit la sirimònia d’espiassion për la colpa comëttùa da cola përson-a, la colpa a-j sarà përdonà.