Ester 8

Capìtol 8

Ël rè a agiss për guerné ij Giudé

8:1 An col dì-lì, ël rè Assuer a l'ha daje a la regin-a Ester la cà d'Aman¹, ël nemis dj'Ebreo. E Mardoché a l'é vnùit dëdnans al rè²; Éster a l'avìa fàit savèj lòn che chiel a l'era për chila. 8:2 Antlora ìl rè a l'é gavasse dal dil l'anel ch'a l'avìa daje a Aman e a l'ha donajlo a Mardoché. E Éster a l'ha daje da masenté la ca d'Aman.

8:3 E nen contenta, a l'é andàita a parlé na sconda vira con ël rè e, campandse ai sò pé, a l'é butasse a pioré fasendje vëdde la gramissia d'Aman l'Agagita e la volontà ch'a l'avìa avù 'd feje dël mal a j'Ebreo.

8:4 Antlora 'l rè a l'ha sporzuje la cavija d'òr a Ester. Parèj che Ester a l'é aussasse, a l'é tnusse an pé 'dnans al rè 8:5 e a l'ha dit: "S'a-j pias al rè, e se mi i l'hai trovà 'd favor ai sò euj, se mia arcesta a l'é smijaje giusta e se mi midema i son piasosa a vëddse, che chiel a veuia revoché spress le litre che Aman, fieul ëd Camdata l'Agagita, a l'ha fàit ëscrive për perde ij Giudé 'd tute le provinse reaj. 8:6 Coma ch'i podrai fèila a vëdde 'l mal che a ven a esse fàit a mia gent? Coma ch'i podrai arziste ant ël vëdde la dëstrussion ëd mia gent?".

8:7 Antlora 'l rè Assuer a l'ha dije a la regin-a Ester e a Mardoché 'l Giudé: "Mi i l'hai daje a Ester la ca d'Aman dòp d'avèjlo fàit pende për avèj vorsù liberesse dij Giudé. 8:8 Scrive adonch pr' ij Giudé lòn che voi i giudichereve bin, ant ël nòm dël rè. Sigilé peui con ël cacèt real. Përchè tut a l'é fàit ant ël nòm dël rè e lòn ch'a l'é cacëttà con sò anel as peul pa cambiesse"³.

8:9 Jë scrivan reaj a son tòst ëstàit convocà, a l'era 'l ters mèis, ch'a l'é Siban, ël dì ch'a fà vintetre, e, sël comand ëd Mardoché, lor a l'han ëscrivù ai Giudé, ai sàtrap, ai governador, ai grand ufissiaj dle provinse da l'India a l'Etiòpia, sentevintessèt provinse, a tute conforma soa manera dë scrive e sò lengage. 8:10 Coste litre, scrivùe ant ël nòm d'Assuer e cacëttà con sò cacèt, a son ëstàite portà da mëssagé montà dzura 'd cavaj dle scuderie dël rè.

8:11 Ël rè a l'ha garantije ai Giudé, an qualsëssìa sità ch'a fusso, ël drit ëd butesse ansema për salvesse la vita, con ël përmess ëd massé e dëstrùe tute le gent armà dij pòpoj o le provinse che a vorèisso tacheje, con soe fomne e soe masnà, parèj coma 'd marodé sò possediment. 8:12 Sòn a l'é fasse 'l midem dì al tute le provinse dël rè Assuer, ël tërdes dël mèis ch'a fà dòdes e che a l'é Adar.

8:13 N'esemplar ëd cost edit a l'é stàit dàit coma comandament e publicà an tra tute le gent perchè ij Giudé a fusso pront për vendichesse dij sò nemis. 8:14 Parèj che ij mëssagé, an montand ëd cavaj reaj, a son partì pì che an pressa an sël comand dël rè. Ël decret a l'é stàit ëdcò publicà ant la sitadela 'd Susa.

8:15 Mardoché a l'é surtì dal rè vestì parèj d'un prinsi con na vestimenta 'd porpra violëtta e 'd lin bianch, con an testa na gròssa coron-a d'òr e con un mantèl ëd damasch e 'd porpra rossa.

8:16 A l'é stàit pr' ij Giudé un dì 'd lus, d'argioissansa, d'onor e 'd festa. 8:17 An tute le provinse, an tute le sità e daspërtut andova ch'a j'ero rivaje ij comand dël decrèt dël rè, ij Giudé a l'han avù 'd dì d'argioissansa e 'd feste. E vàire an tra la gent dël pòst a son fasse Giudé⁴: përchè la tëmma dij Giudè as fasìa greva dzura 'd lor.

Nòte

1 Second le usanse persian-e, le proprietà dël traditor a j'ero confiscà da la coron-a.

2 A Mardoché a l'é stàit dàit na posission ufissial (1:14) e a l'ha ciapà 'l pòst ch'a l'avìa avù Aman.

3 Combin che 'l rè a podèissa nen arvoché 'l decret formal (1:19), chiel a dà a Éstes e a Mardoché l'autorisassion ëd emané n'àutr decret ch'a l'avrìa cassà 'l prim.

4 La conversion ëd gent d'àutre nassion a la fej israelita a marca 'l pont pì àut ëd ësta conta (cfr. Giosué 2:9; Esod 15:14-16; Salm 105:38).

https://lumina.bible.org/bible/Esther+8

À à È è É é Ì ì Ò ò Ó ó Ù ù Ë ë