1 Cronache 18

1 Cronache

18

Espansion dle vitòrie 'd David

1:1 Dòp tut sòn , David a l'é andàit a taché ij Filisté e a l'ha sotmetùje, gavandje sò domìni an sla sità 'd Gat con tuti sò anviron dipendent. 1:2 E a l'ha frapà Mòab, e ij Moabita a son andàit a esse servent ëd David: e a l'han pagaje tribut. 1:3 E David a l'ha dcò colpì davzin a Amat: Adadeser, re 'd Zòba, che a vorìa buté soe borne fin-a al fium Eufrat.

1:4 E David a l'ha ciapà mila chèr da guera, e set mila sivalié, e vintmila soldà 'd fanteria; e David a l'ha tajà ij garèt a tuti ij cavaj da tir, gavà 'd në senten-a che a l'ha tenù da cont.

1:5 J'Aramé'd Damasch a l'ero vnùit an socors a Adadeser, re 'd Zòba; e David a l'ha massà vintedoimila Sirian. 1:6 E David a l'ha butà'd garnigion ant la Siria'd Damasch, e coj Aramé -là a son assogetasse a servì David: e a l'han smonùje 'd tribut. Nosgnor a -j dasìa protession e vitòria a David daspërtut andova che chiel a andasìa. 1:7 E David a l'ha ciapà jë scud d'òr dla guardia d'Adadaser e a l'ha portaje a Gerusalem. 1:8 E a l'ha dcò pijàit tut ël bronz ëd Tibach e 'd Con, sità d'Adadeser. Pì tard a sarìo servù a Salomon për costrùe 'l mar ëd bronz, le colòne e j'utis d'aram për ël Templ.

1:9 E Tòu, re 'd Camat, a l'avia sentù dì che David a l'ha butà an dërota tuta l'armeja d'Adadeser, re 'd Zòba; 1:10 e a l'ha mandaje sò fieul Aduram ,për salutelo e felicitesse d'aveje fait la guera contra d'Adadeser e avèilo batù. Adadeser a stasìa an guera contra Tòu. Tut l'òr, l'argent e l'aram, 1:11 re David a l'ha sacralo a Nosgnor, con l'argent e l'òr che a rivava da tute le gent che chiel a l'avia sotmëtù, parej d'Edom, ëd Moab, dj'amonita1 e dj'Amalech. 1:12 E Abisai, fieul ëd Zeroià, a l'ha frapà ant la comba 'd Sal disdeutmila Edomita. 1:13 Peui a l'é andait a stabilì 'd governator an tra j'Edomita, përchè a-j fùisso assogetà. Nosgnor a-j dasìa vitòria an tut lòn che chiel a fasìa.

Funsionari dël regn

1:14 David a regnava dzora 'd tuta Israel. A governava tuta soa gent conform al drit ëd giustissia. 1:15 Ioab, fieul ëd Zeruià, a l'era comandant an cap dl'Esércit; Giòsafat, fieul d'Achilod, a l'era archivista [2]. 1:16 Zadòch, fieul d'Achitob, e Abimelech, fieul d'Abiatar, a l'ero sacerdòt; Savsà scrivan [3]. 1:17 Benaià, fieul ëd Ioiadà, a comandava ij Creté e ij Peleté. Tuti ij fieuj ëd David a l'ero an tra ij prim a giuté'l re.

Nòte

• [1] opura: dij Filisté.

• [2] opura: cronista.

• [3] opura: cancelié.