Amos 3

3

Minca n’efet a l’ha na càusa

3:1 Scoté costa paròla che Nosgnor a dis contra 'd vojàutri, masnà d'Israel, contra 'd tuta la famija che i l'hai fàit monté dal pais d'Egit! 3:2 Mi i l'hai sernuve, mach voi an tra tute le famije dla tèra; a l'é për sòn che 'v castigherai për tute vòste përversità. 3:3 Miraco che doi òm a marcio ansema sensa savèilo? 3:4 Breugia-lo forse, 'l leon ant la foresta sensa che a-i sia cheicòsa da ciapé? 3:5 Ël lionòt a crija dal fond ëd soa tan-a sensa avèj fàit na piàita? 3:6 Son-lo la tromba ant na sità, sensa che a-i sia pa chèich ësburdiment ant la gent? Miraco che a-i riva un maleur ant na sità sensa che Nosgnor a në sia pa l'autor? 3:7 Përchè 'l Signor a fà gnente sensa fene part ai sò servitor, ij profeta. 3:8 Ël leon a braja: chi è-lo che a n'avrà pau? Nosgnor a parla: col che a l'é che a në farà professia.

Samarìa a tombrà

3:9 Fé arsoné vòstra vos ant ël palass d'Asdod e ant ël palass dël pais d'Egit, e dì: buteve ansema an sle montagne 'd Samarìa, e vardé che rabel gròss che a-i é, che 'd violense che a j'ancapito an mes! 3:10 Lor a san pa comportesse con dritura, a dis Nosgnor, lor a ambaron-o ant ij sò palass la pijàita 'd la prepotensa e dël ravage. 3:11 A l'é për lòn che Nosgnor a dis parèj: "Ël nemis a anvadrà 'l pais, a dëstruvrà toa fòrsa, e ij tò palass a saran ravasà".

3.12 Përparèj a dis Nosgnor: " Coma che 'l bergé a riva a salvé 'dcò mach doe piòte o na ponta d'orìa, parèj as salvran ij fieuj d'Israel che a stan an Samarìa, an sël bòrd d'un let o dzora d'un tapiss ëd damasch.

3:13 Scoté e dije sòn a ca 'd Giacòb! A dis Nosgnor, ël Dé dj'Armeje. 3:14 Scoté e atesté sòn a la ca 'd Giacòb-oràcol dël Signor Dé dl'univers: " Ël di che i farai un castigh për le trasgression d'Israel, i colpirai an sj'autar ëd Betel; a saran fàit a tòch ij còrn dl'autar, a tombran për tèra. 3:15 I-j darai ël gir a le ca d'istà e d'invern; ij palass d'avòri a tomberan e a spariran le ca gròsse", oràcol dël Signor.