Levìtich

6

Funsion e dover dij sacerdòt

¹Nosgnor a l’ha parlà ancora a Mosè. A l’ha dije: ²“Fà savèj a Aron e ai sò fieuj che costa-sì a l’é la lej dj’olocàust: ‘La vìtima sacrificà a starà tuta la neuit al sël brasé dl’autar fin a la matin, e ‘l feu dl’autar a l’ha da sté anvisch. ³Ël sacerdòt as butrà adòss soa vestimenta ‘d lin dëdzura e soe braje ‘d lin ëd sota. A prelevrà da l’autar le sënner dla vìtima consumà dal feu e a le lasserà aranda dl’autar. ⁴Peui, as muderà ‘l vestì e a porterà le sënner fòra dal campament ant un leugh pur da la mira ritual. ⁵Ël feu dl’autar as l’avrà mai da dëstissesse: ël sacerdòt a-j giontrà ‘d bòsch minca matin e dëdzora a rangierà la vìtima oferta an olocàust. A-i farà brusé la grassa dij sacrifissi ‘d comunion. ⁶Un feu sèmper anvisch a dovrà essie sèmper an sl'autar, e as dovrà mai lasselo dëstissé’.

Oferte ‘d farin-a

⁷Costa-sì a l'é la lej për le oferte ‘d farin-a: ‘Ij sacerdòt dissendent d’Aron a presenteran l’oferta dëdnans a Nosgnor an facia dl’autar. ⁸Un ëd lor a ciaprà na branca ‘d fior ëd farin-a ampapëttà d’euli con tut l’ancens ch’a-i é dzura dl’oferta, e a lo farà brusé an sl’autar coma ‘n memorial d’odor agreàbil a Nosgnor. ⁹Lòn ch’a vansa dl’oferta a lo mangeran Aron e ij sò fieuj, sensa alvà e ant un leugh sacrà ant la cort dla Tenda dël Rëscontr. ¹⁰A dovrà mai esse cheuit con alvà. A l’é la part ch’i-j dago da le oferte ch’a l’han da brusé për mi. A l’é quaicòs ëd santissim, coma ch’a l’é col dij sacrifissi d’espiassion pr’ ij pëccà o dij sacrifissi ‘d riparassion. ¹¹A na mangeran tuti j’òm e ij fiolin dissendent d’Aron, përchè costa part dj’oferte brusà a mè onor a l’é la mìa për sèmper. Tut lòn ch’a vnirà tocà da sossì a resterà sacrà.

L’oferta ‘d consacrassion sacerdotal

¹²Nosgnor a l’ha parlà ancora a Mosè. A l’ha dije: ¹³“Costa-sì a l’é l’oferta che Aron e ij sò fieuj a l’ha da presenté a Nosgnor ant ël dì dla soa consacrassion ëd lor: tre chilo ‘d fior ëd farin-a coma n’oferta përpètua, la metà a la matin e l’àutra metà a la sèira. ¹⁴A l’ha da fesse cheuse con d’euli ant la feuja d’aram. Apress a la faran a tochetin e a la presenteran an fórma d’oferta sfërvajà d’odor agreàbil a Nosgnor. ¹⁵Ant ël moment che ‘n dissendent d’Aron, coma ij sò sucessor, a sarà consacrà Gran Sacerdòt, a farà la midéma oferta. Costa-sì a l’é na lej përpètua. L’oferta a sarà brusà antrega an onor ëd Nosgnor. ¹⁶Tuta l’oferta presentà an favor d’un sacerdòt a sarà brusà antrega: gnun a na podrà mangé”.

Sacrifissi pr’ ij pëccà

¹⁷Nosgnor a l’ha parlà ancora a Mosè. A l’ha dije: ¹⁸”Fà savèj a Aron e ai sò fieuj che costa-sì a l’é la lej dij sacrifissi pr’ ël pëccà: ‘La vìtima oferta pr’ ël pëccà a sarà sgorzà dëdnans a Nosgnor ant ël leugh anté ch’a së sgòrzo le vìtime oferte an olocàust. A l’é quaicòsa ‘d santìssim. ¹⁹Ël sacerdòt ch’a smon-a ‘l sacrifissi pr’ ël pëccà a na mangerà, ma ant un leugh sacrà, ant la cort dla Tenda dël Rëscòntr. ²⁰Tut lòn ch’a toca la carn dla vìtima a resterà sacrà, e s’a càpita che ‘d sangh a sghicéissa an sle veste, la macia as l’avrà da netié ant un leugh sacrà. ²¹Se ‘l vas anté ch’as fà beuje la carn ëd la vìtima a l’é ‘d teracheuita, apress as lo dovrà s-ciapé; ma se ‘l vas a l’é d’aram, a l’avrà da esse fërtà e arzentà con tanta eva. ²²Tuti j’òm e ij fiolin ch’a aparten-o a le famije sacerdotaj a podran mangé la carn dë sti sacrifissi-sì. A l’é quaicòsa ‘d santìssim. ²³Tutun, gnun a podrà mai mangé la carn ëd cole vìtime ch’as n’ha portà ‘l sangh ant la Tenda dël Rëscontr per fé la sirimònia d’espiassion ant ël santuari. Tut a l’avrà da ess-ne brusà.