1 Rè

4

La cort ëd Salomon

¹Ël rè Salomon a l’era sovran ëd tuta Israel. ²Costi-sì e j’ero ij sò dignitari: ël sacerdòt Asaria, fieul ëd Sadoch. ³Elicoref e Achia, fieuj ëd Sisa, scriba. Giosafat, fieul d'Achilud, archivista. ⁴Benaià, fieul ëd Ioiada, cap ëd l'armeja. Sadoch e Ebiatar, sacerdòt. ⁵Asaria, fieul ëd Natan, cap dij prefet. Zabud fieul ëd Natan, amis dël re. ⁶Achisar mèstr ëd ca. Adoniram, fieul d'Abda, sovrantendent a j'ës-ciavandari.

Prefet ëd Salomon

⁷Salomon a l'avìa dódes prefet^[1] dzora tuta Israel; costi-sì a provëddìo al rè e a soa famija; mincadun a l'avìa l'ancàrich ëd trové proviande për un mèis a l'ann. ⁸Costi-sì a j’ero ij sò nòm: un fieul ëd Cur, an sle montagne d'Efraim; ⁹un fieul ëd Decher, a Macas, a Salbim, a Bet-Semes, a Aialon fin-a a Bet-Canan; ¹⁰un fieul ëd Chesed, an Arubòt; sò a l'era Soco e tut ël pais ëd Chefer; ¹¹un fieul d'Abinadab, che a l'avìa tuta la còsta 'd Dor (soa fomna a l'era Tafat, fija 'd Salomon); ¹²Bana, fieul d'Achilud, a l'avìa Tanach, Meghido, fin-a dë dlà d'Iacmeam, e tut Beisan ch'a l'é sota Isrel, da Beisan fin-a a Abel-Mecola che a l'é anvers Zartan; ¹³un fieul ëd Gheber, an Ramot ëd Galad; chiel a l'era padron dij pais ëd Iair, fieul ëd Manasse an Galad; a l'avìa 'dcò ël distret d'Argob an Basan, sessanta gròsse sità con muraje e sbare 'd bronz; ¹⁴Achinadab, fieul d'Ido, a Macanaim; ¹⁵Achimas an Neftali - 'dcò chiel a l'avìa marià na fija 'd Salomon, Bosmat; ¹⁶Bana, fieul ëd Cusai, an Aser e an Zabulon; ¹⁷Giosafat, fieul ëd Paruach, an Issacar; ¹⁸Simei, fieul d'Ela, an Beniamin; ¹⁹Gheber, fieul d'Uri, dël pais ëd Gad, na vira tèra 'd Sicon rè dj'Amorita e d'Ogh re'd Basan. Dzor pì a-i j'era un prefet ant ël teritòri 'd Giuda.

²⁰La popolassion ëd Giuda e d’Israel a l’era numerosa tanme la sabia dël mar e, bin content, a mangiavo e a beivìo.

La richëssa e la fama ‘d Salomon^[2]

²¹Salomon a dominava an sù tùit ij regn dal fium Giordan fin-a al teritòri di Filisté e ai finagi dl’Egìt al meridion. Ij pòpoj conquistà ‘d cole nassion a mandavo ‘d tribùt a Salomon e a l’han seguità a servje për tut ël temp ëd soa vita. ²²Salomon a arsevìa le proviande për tùit coj che a l'ero mantnù da chiel, ant l'órdin ëd tranta cor ëd fior ëd farin-a e sessanta 'd farin-a ordinària; ²³des beu d'angrass, vint beu da pastura, sent feje sensa conté ij cerv, ij cravieuj, d'antìlopi e polastr d’anlevament.

²⁴Ël domìni ‘d Salomon a së spantiava pët tùit ij regn a ocident dël fium Eufrat, da Tifsa fin-a a Gasa. A-i era la pas për tùit ij finagi d'antorn. ²⁵Për tuta la vita ‘d Salomon, Giuda e Israel a l'han abità an sicurëssa da Dan fin-a a Ber Seba; minca na famija a l’avìa soa ca e sò òrt^[3].

²⁶Salomon a l'avìa an soe stale quatmila tir ëd cavaj, e le dotassion dij sò cher ëd guèra a rivavo a 12.000 òm.

²⁷Minca un dij sò prefèt^[4] a provëddìo un mèis a l’an pr’ un le vitovaje pr’ ël rè Salomon e tuta l’aministrassion real. A l’avìo l’incombensa ch’a-j manchèissa gnente. ²⁸Minca un ëd lor, scond j’istrussion ch’a l’avìo arseivù, a portavo ëdcò soa cotiss d'òrdi e 'd paja për ij cavaj da tir e da sela ant lë stalagi designà.

²⁹Nosgnor a l’avìa acordaje a Salomon saviëssa e motobin d'anteligensa, nen mach, ma 'dcò na conossensa granda parèj dla sabia ch'a l'é an sla rivera dël mar. ³⁰La saviëssa 'd Salomon a l'era, an efet, motobin ëd pì che cola 'd tùit ij pòpoj orientaj e 'd cola dl'Egit. ³¹Dabon, chiel a l'era pì savi 'd tuti, pì che Etan l'Esrachita, pì d'Eman, Calcol e 'd Darda, ij fieuj ëd Macol. Sò nòm a l'era dventà famos an tra tute le gent dj'anviron ³²Chiel a l'ha butà ansema tremila proverbi e l’ha scrivù mila e sinch canson. ³³Salomon a l'é 'dcò anteressasse dla vita dle piante, dal séder dël Lìban a l'issòp ch'a s-ciòda da le muraje. A l'ha 'dcò parlà d'animaj e osèj, réptij e 'd pess. ³⁴Fin-a ‘d rè da tante nassion a-j mandavo ij sò ambassador mach për ësté a sente la saviëssa ‘d Salomon.

Nòte

1. O ”governator”.

2. Dal vers 4:21 la numerassion fin-a a 5:18 ‘d nòstra version a l’é diferenta da cola dët test ebràich (BHS). Da 6:21 a torna peui a esse la midéma

3. O “tuti sota soa vigna e sò fié”

4. O “governator distretuaj”.