Abacuch 2

2

Nosgnor a-j rëspond a le domande dël Profeta

¹Mi i vado a buteme a mè post ëd vardia, i vado a resté an pé an sla fortëssa; mi i farai babòja, për vëdde lòn che am dirà, lòn ch' a rëspondrà a mie plente. ²Antlora Nosgnor a l'ha rëspondume e a l'ha dit: "Scriv la vision, gravlo da bin an s' ëd taulëtte, përchè ch'as peussa lese fàcil. ³Përchè a l'é na vision che a l'é mach për sò temp: a parla d'un termo e a dis pa 'd busiardarìe; se a bëstanta, spetla, përchè a vnirà sicura, e a tarderà pa! ⁴Varda,col che a l'ha nen n'ànim ëd dritura a tomba, ma 'l giust a vivrà për soa fedeltà. ⁵Sicura, la richëssa a tradis! Ël cacam a perd ël sens ëd le ciòse e a s'àgita, col che a slarga soa boca coma lë Sheol^[1], che a n'ha mai pro, tanme la mòrt, col che a ambaron-a për chiel tùit ij pòpoj e a buta ansema për chiel tute le nassion! ⁶Forse che antlora ij conquistà a faran pa 'd sàtira contra 'd chiel? Miraco che a vireran-ne pa d'epigrama contra 'd chiel? Lor a diran:

Le sinch amprecassion

Maleur a col che a ambaron-a ij beni d'jàutri! E fin-a a che mira? Maleur a col che as caria d'un fardel ëd gagi! ⁷Ma quand che men-o iv lo spete a rivran ij vòsti creditor e av faran tramblé. Ti it saras soa pijàita! ⁸Vojàutri i maròde tanta gent, ma dcò j'àutri pòpoj av butran a sach. E sòn për ël sangh ch' i verse e për la violensa fàita a le nassion, a le sità e ai sò abitant.

⁹Maleur a col che a fà 'd rapin-e nen giuste për soa ca, për fesse na sosta sicura contra ij colp dël maleur! ¹⁰Ij tò proget a l'han campà onta ansima a toa ca: an campand giù vàire gent ti it l'has travajà contra 'd ti midem. ¹¹Fin-a le pere istesse dle muraje a crijo e le trav ëd bòsch a-j rëspondo.

¹³Maleur a col ch'a fabrica na sità ant ël sangh e a fonda un pais an sl' ingiustissia! ¹³A l'é pa fòrse la volontà 'd Nosgnor ëd j'Armeje che ij pòpoj a pen-o për ël feu, che le nassion a së straco për gnente? ¹⁴Përchè la tèra a sarà ampinìa dla conossensa 'd Nosgnor parèj coma j'eve a coato 'l fond dël mar!

¹⁵Maleur a chi a fa bèive ij sò avzin, a col che a versa so tòssi fin-a a anciocheje, për vëdne soa nudità! ¹⁶Ti it ses pien ëd perversità, ëd glòria! Beiv a toa vira e fà vëdde toa virilità ampura! A darà 'l gir ansema a 'd ti, la san-a dla drita 'd Nosgnor, e l' onta a va a cheurve toa glòria! ¹⁷Përchè la violensa fàita al Lìban at sotrerà, parej coma l'amassidi dj'animaj a të sbaruverà, përchè ti it l'has vërsà sangh uman, violentà 'l pais, la sità e tuti coj che a jë stan andrinta!

¹⁸Guai a col che a dis al bòsch: "Dësvijte", e a la pera muta: "Àusste". Varda, a l'é coatà d'òr e d'argent ma drinta a-i è pa sofi 'd vita. ¹⁹A còsa a serv-lo na scoltura për che l'artista as daga la pen-a dë scurpila? Opura na statua fondùa o n'oràcol fàuss për che l'artista a l'abia fiusa an lor, an scurpend ëd mistà mute? ²⁰Nosgnor a stà ant sò Templi sant. Che tuta la tèra a staga ciuto dëdnans ëd chiel!

Nòte

1. Lë "Sheol" as chërdìa ch'a fussa 'l mond sot-tera ch'a l'era l'abitassion dle ànime dij mòrt, la tomna "ch'a l'ha sèmper fam".