Levitich 22

22:1 Nosgnor a l'ha parlaje a Mosè, comandandje: 22:2 Parla a Aron e ai sò fieuj, che as faso fòrt, con j'oferte sacrà a mi, consacrà da j'Israelita, sensa ch'a në profan-o mè sant nòm. Mi i son ël Signor. 22:3 Tùit coj an tra vòstra rassa, 'dcò an tra vòstri dëssendent, che andèisso a avzinesse a lòn che a l'é sant presentà da ij fieuj d'Israel, ma ch'a l'abio dzora 'd lor càiche stat d'ampurità, cola person-a a sarà rancà via da dëdnans ëd mi. Mi i son ël Signor. 22:4 L'òm ëd la stirp d'Aron, che a l'avrà la lebra o la gonoréa, a mangerà pa 'd pianta lòn che a l'é sant, fin-a ch'a sia pur. A sarà 'dcò përparèj për chi a l'avèissa tocà na caròpa, sporcàndse, e 'dcò për col che a dovèissa avèj n'emission dë smens, 22:5 opura n'òm che a tochèissa na bestiòta che a së strùsia e a në fùissa restà antamnà, o chi a fùissa sporcasse con càiche scrosarìa. 22:6 La person-a che a toca chèicòsa 'd lòn, fin-a sèira a sarà impur; a mangerà pa lòn ch'a l'é sant se anans a sarà nen lavasse sò còrp con l'eva. 22:7 Cora che 'l sol a tramontrà ant ël cel, chiel a sarà pur, e antlora a podrà mangé lòn ch'a l'é sacrà, përchè a sarà sò nutriment. 22:8 A mangerà nen ëd na bestia mòrta o sbranà: as rendrìa impur për lòn: Mi i son ël Signor. 22:9 Che a guerno mie prescrission, përchè a riva pa che për chèicadun-a 'd lor a vado a tombé an colpa e a l'àbio da meuire për avèj profanaje: Mi i son ël Signor che i l'hai santificaje. 22:10 Gnun strangé a podrà mangé lòn che a l'é sant: col che a stà con ël sacrificator e'l servent dël prèivi a në mangeran pa, 22:11 ma se 'l prèivi a l'ha catalo con sò dné, costa person-a a podrà mangene; parèj 'dcò chi a l'é nassù ant ëcà: a podràn mangé dël sò pan. 22:12 Nopà, la fija dël prèivi marià a 'n frosté, a podrà pa mangé le sante contribussion smonùe, 22:13 ma se la fija dël prèivi a l'é vidoa o divorsià sensa fieuj, tant da podèj torné a vive ant la ca dël pare tanme an soa gioventura, chila a podrà mangè dël pan ëd sò pare, combin, gnun strangé a podrà mangene. 22:14 Se n'òm a dovèissa mangé sensa fesne, cheicòsa 'd sacrà, a rendrà al prèivi ël valor sant, an giontàndje un quint. 22:15 Ij sacrificator a profaneran nen j'oferte sacrà che j'Israelita a smon-o a Nosgnor, 22:16 e costi-sì a devo pa grevé 'd na colpa che a ciamerìa na riparassion, se a mangèisso lòn che a l'è sant, riservà ai sacrificator. Mi i son ël Signor che i l'hai faje sant. 22:17 Peui Nosgnor a l'ha ancora dije a Mosè: 22:18 Parla a Aron e ai sò fieuj e a tùit j' Israelita e dije: Cada fieul d'Israel, o person-a forëstera che a stà an Israel, cora che a vorèissa fé n'oferta an olocàust për Nosgnor, o adempiment d'un vot, o tanme oferta 'd lìbera volontà, 22:19 për esse agradì, a dovrà presentè un tòr, un moton o 'n boch, tùit sensa macia. 22:20 I-i smonreve pa na vìtima che a l'àbia 'd difèt, përchè a saria nen agradìa. 22:21 E 'dcò, cora che un a smon a Nosgnor un sacrifissi 'd pas ëd cabial gròss, opura strop cit, për adempì a 'n vot particolar, o për devossion, la vìtima a dovrà esse sensa macie, për esse agradìa: a dovrà esse sensa difèt. 22:22 Mai smon-e a Nosgnor tanme vìtima na bestia ch'a sia bòrgna o stropià, o mutilà, o con d'ólciole, o rognosa, opura con ël feu servaj: voi i butreve pa coste vìtime an sl'autar an sacrifissi al Signor. 22:23 Tanme oferta volontaria a podrà esse smonù un beu o na feja, 'dcò se a l'avèisso un mèmber pì longh o pì curt che l'àutr, ma nen për l'adempiment d'un vot, përchè costa oferta a sarìa pa agradìa. 22:24 Ant ël vòst pais vojàutri i ufrireve pa a Nosgnor na bescia ch'a l'àbia ij testìcoj sgnacà, s-ciapà, s-ciancà, tajà: i fareve mai dë ste oferte an vòst pais. 22:25 Nen mach, ma i acetereve gnun-a dë ste vìtime gnanca da la man d'un frosté, për smon-e da mangé për vòst Dé, përchè a son mutilà o falëtte: e voi për lòn i sarìe pa agradì.

22:26 Ël Signor a l'ha parlà a Mosè: 22:27 Al moment che 'n beu, un moton o na crava a son nassù, a dev sté sota 'l soèn ëd soa mare për set di, ma dal di che a fà eut anans, a podrà esse acetà tanme sacrifissi smonù a Nosgnor con ël feu. 22:28 Beu o babero, vojàutri sgorzereve pa an sacrifissi n'animal e sò cit ant ël midem di. 22:29 Quand che i andreve a eufre a Nosgnor un sacrifissi d'assion ëd grassie, vojàutri i fareve an manera che a sia agradì. 22:30 La vìtima a sarà mangià ant ël di midem; voi i në lassereve pa për la matin che a ven: Mi i son ël Signor. 22:31 Vojàutri i l'eve da esse sicur ëd fé mie ordinanse . Mi i son ël Signor. 22:32 Voi i profanereve pa 'd pianta mè nòm sant, përchè mi i sia santificà an mes ai fieuj d'Israel: Mi i son ël Signor che 'v santìfico, 22:33 e che i l'hai fave seurte dal pais d'Egit për esse vòst Dé. Mi i son ël Signor.